TURA: Re·anggipa antionin Meghalaya a·dok gimikon World Environment Week-ko manitokengon, Garo Hills-oba ia World Environment Day-ko dingtang dingtang biaprango maniangtokaha.
West Garo Hills a·jani Selsella block-o ia World Environment Day-ko Narangbari kal·chakramo maniangaha aro ia manianio Selsella constituency-ni MLA Ferlin CA Sangma, mongsonggipa sokgipa ong·e bakko ra·angaha.
Ia World Environment Day-ko Selsella C&RD Block office-ni gita manidilangaha aro ia manianio songni Nokmarang, dingtang dingtang VEC-ni dilgiparang, chatro chatrirang, NGO-rang aro jolo songdongenggipa manderangba dongpae bak ra·angtokaha.
Ia salko manianio, re·anggipa March-ni 29 tariko Jal Shakti Ministry-ni Delhi-o ong·atanggipa 3rd National Water Awards-o ‘Best Village Panchayat-North East Zone’ category-ni gittamgipa boksisko man·baahani gimin dingtangmancha Chambagre VEC-ni secretary-na mande ra·pilskaaniko dakangenba, gong 10000 tangka baksana certificate-ko on·angjolaha.
Ia World Environment Day-ko maniani bak gita Selsella-o bolrangko ge·angan baksana bol chararangkoba suale on·angaha aro skulo poraienggipa chatro chatrirangna noksa salsusaanikoba ong·atangaha.
Indake ong·engon, South West Garo Hills a·jaoba ia World Environment Day baksana Meghalaya a·dokni bilsi 50 gapanikoba Sombar salo maniangjolaha aro ia salko manianio, bolrangko ge·angan baksana jatni ring·ani aro chrok mesaani, jatni kal·susaani aro dingtang dingtang manderangni git ring·e an·saoatanirangkoba nikangna man·aha.
Ia program-ko Ampati-ni Multi facility Centre-o a·bachengatanio, South West Garo Hills a·jani Deputy Commissioner SK Marak, dingtangmancha ‘Green Pledge’-ko dakdilangenba, ia World Environment Day-ni gimin jinmana kan·dike agan-talate on·angaha.
Ia salko manianio dingtangmancha Chengkurigre songko District NRM Award-na seokahani gimin songni dilgiparangna mande ra·pilskaanikoba dakangjolaha.
Environment Week-ko maniani bak gita skulo poraienggipa chatro chatrirangna debate, essay sesusaani aro noksa salsusaanikoba ong·atangaha aro chegiparangna ia salo SWGH a·jani Deputy Commissioner SK Marak aro ADC PK Sangma-ni jakchi boksisrangko suale on·angaha.
Ia salko manianio dingtangmancha Meghalaya Games 2022-o medal chebagipa mande sakgittamnaba mande ra·pilskaaniko dake, tangka aro certificate-rangko boksis dake on·angaha.
Apsan daken, North Garo Hills a·jaoba World Environment Day-ko Sombar salo, Resubelpara-ni Bakrapara MFC-o maniangaha aro ia salko manianio a·jani dingtang dingtang biaprango bolrangko ge·angan baksana rongtalatani program aro skulo poraienggipa chatro chatrirangna, noksa salsusaani, debate aro essay sesusaanirangkoba ong·atangaha.
Ia salko manianio North Garo Hills a·jani Deputy Commissioner RP Marak, mongsonggipa sokgipa ong·e jinmana aganprakangengon, samtangtango ong·telaigiparangko tangatpiltaichina aro ripinge rakkiangchina gita chatro chatrirangko, SHG membor-rangko, songni nokni dilgiparangko aro a·jani official-rangko didiangaha.
Environment Day-o ge·enggipa bolrangko galchipaigija, uarangko dal·atna gita salantian simsak nirokchina gitaba Marak didiangaha.
Indake ong·engon, Tura CAU-ni ning·o donggipa Community Science College-ni All India Coordinated Research Project (AICRP)-ni gitaba Sombar salo, Gambegre block-ni ning·o donggipa Bolwari Darechikgre songo World Environment Day-ko manidilange, songni bi·sarang aro skulo poraienggipa bi·sarang baksa bite nanggipa bol chararangko ge·angaha.
