Adokgre te·rik bazar-o ripinge rakkichakani dongjae te·rikrang nasie bon·na nangenga

TURA: North Garo Hills a·jani Adokgre te·rik bazar-o bosturangko ripinge rakkichakani dongjani a·sel game ge·e cha·giparang, palnanggijagipa te·rikrangko songtangtangonaba ra·angpilna neng·nike bazar cha·chakgipa biapon gale donangna gita nangenga aro uandaken game ge·e cha·giparangni neng·e man·enggipa te·rikrang indin nasie bon·na gita nangskaenga.
Iani bidingo adita salrangna skangsan, jolni mande saksa, Adokgre bazar-o ong·enga obostako video ka·enba, social media-o watatahachim aro ia video-oniko niksona man·ani gitade, ia te·rik bazar-ona te·rikrangko olni ol ra·baenggipa manderang, attamo palnangjaenba, songtangtangchiba ra·angpilna neng·nike ia biapon gale donangtokaiaha aro ia te·rikrangko songni matchurangsa cha·e bon·atskaahachim.
Jolo songdongenggipa manderangni u·iatani gitade, iandakgipa obostako salantide nikna man·rongjachim indiba Bihar aro West Bengal gita dakgipa biaprangoni bading chiwalgiparang ia te·rik bazar-ona sokbana man·jahaode, songo noko game ge·e cha·giparang, an·tangtangni game ge·e man·gipa bosturangko iandake galna gita nangrongskaaiahachim.
Ia te·rik bazar-ona te·rikrangko palna ra·baenggipa manderang, chel·begipa songrangoni cycle-rangosa an·tangtangni te·rikrangko ra·baengani gimin attamo palnangjahaode, te·rikrangko songtangtangona ra·angpilna neng·nike bazar-on galangna gita nangaiaha ineba jolni manderang u·iataha.
“Chel·begipa songrangoni te·rikrangko palna ra·baenggipa manderang, te·rik olprako gong 50-oni gong 100-mangonasan palna man·aia aro te·rikrangko garirango ra·bagenchimode te·rik olprakon gong 10-mang ka·e gamna nangenga. Te·rik bazar-ona gipin biaprangoni bading chiwalgiparang bang·e sokbaode te·rikrangko bon·e palna man·aia indiba te·rikrangko palnangjahaode songtangtangona ra·angpilanio koros bate nangskaenga. Te·rikrangko songtangtangchi ra·angpilna sikgenchimoba bang·bata somoirangon garirang dongjae ra·angpilna man·ja, uni gimin te·rikrangko ia biapona matchurangnasa ale donangna nangaia,” ine Adokgre-o game ge·e cha·enggipa mande saksa parakataha.
Te·rikrangara ta·raken soninggipa ong·ani giminn ripinge donchakani bosturang dongjani a·selba game ge·e cha·giparang noksan ong·na gita nangtokenga ine jolni mitam manderang parakataha.
Koborko on·ani gitade, iani bidingo jolo game ge·e cha·giparang, cold storage ba ripinge rakkichakani bostuko on·china gita a·dok sorkarinaba sedoatahachim indiba da·o dipet ia jolo game ge·e cha·giparang maming dakchakanirangko man·kujaenga.