SHILLONG: NPP-chi dilenggipa MDA sorkarina chakpaaniko on·ani gimin ra·galako man·gipa sakbonga MLA-rang, Congress dolona re·angpiljana manchimanaha.
“Chingaba MLA-rang ong·e an·tangtangni mikkim donga aro chingko seoke watatgipa manderangna on·kange kam ka·giparang ong·ani gimin Congress dolona re·angpiljawaha,” ine East Shillong-ni MLA Ampareen Lyngdoh parakataha.
Lyngdoh-ni parakatani gitade, uni East Shillong constituency-oba Congress dol, unbaksa aro block committee baksa agangrikchenggija gital president-ko songna tik ka·aha aro ia president-an 2023 bilsini Assembly election-na an·tangko Congress candidate ine mesokengaha.
Re·baenggipa election-o ra·gala man·gipa sakbonga MLA-rangko Congress dolo susana biapko on·jawa ine uamang ma·sienga aro da·o uamang gipin dolrangoni susana tarisamsoana agrede gipin cholrang dongjaenga ineba Lyngdoh parakataha.
AICC-ni Meghalaya in-charge Manish Chatrath, adita salrangna skangsan Shillong-ona re·baahachim indiba ua ra·gala man·gipa MLA-rangko grongna cholko ra·jaha ineba ua aganaha.
Lyngdoh-ni parakatani gitade, Congress dolni niamrangko pe·e ia sakbonga MLA-rangko a·doktangni dilgiparangsa ra·galna tik ka·ahachim aro iani giminsa uamang a·bachengo aganchakanikoba on·jahachim.
Badia dolo napna miksongenga ine sing·on, ua an·tang manderangni nangnikani gitasa ja·kuko de·anggen ine Lyngdoh parakataha.