SHILLONG: Meghalaya a·doko niam gri coke karkanarangko chalaienga ine matnanganirangko a·dokni Chief Minister Conrad K Sangma jegalataha.
Jaintia Hills-o niam gri chalaienggipa coke karkanarangni gimin sing·on, da·o dipet a·doko niam gri chalaienggipa coke karkanarang dongja ine Chief Minister parakataha.
A·doko samtangtangko name nirokani aro economy-ko apsan ong·ate rakkina kam ka·aniara namen rakbegipa kam ong·a ine janapatengon, dingtang dingtang niamrangko ja·rikesa karkanarangko kulina man·a ine Sangma parakataha.
“A·doko niam gri chalaienggipa coke karkanarangko chipattokaha aro nangchongmotgipa lekkarang donggipa karkanarangkosan chalaina on·enga,” ine Chief Minister aganaha.
Economy-ko tange rakkina gita kamrangko ong·katatna kam ka·engon, samtangtango ong·telaigiparangko chel·chakna gitaba sorkari, nambata kolrangko jakkalna jotton ka·enga ineba Chief Minister parakataha.
A·dok sorkari, niam gri coke karkanarangko kulina on·jawa ineba Sangma aganaha.
East Jaintia Hills a·jani Elaka Sutnga-o niam gri chalaienggipa dam 29 coke karkanarang donga ine parakatenba, ia coke karkanarangko ra·galchina gita Elaka-ni Environment Coordination Committee (ECC), a·dokni chief minister-ko didiangahachim.
ECC-ni general secretary Pynbait Sutnga-ni chief minister-na sedoatgipa chittio parakatani gitade, ia Elaka-o chalaienggipa coke karkanarangni bidingo RTI ka·e am·sandion, ia karkanarangara niam gri chalaienggiparangsa ong·a ine Meghalaya State Pollution Control Board-ni talataniko man·soahachim.
