SHILLONG: Meghalaya a·doko tangka paisarangko jakkalsretanina sorkarini kosako matnanganirangko nikna man·engon, a·doko donggipa damgittam autonomous district council (ADC)-rangoba somoi gita account-rangko tarijaenga aro korosrangko see rakkijaengani a·sel audit-rangko ka·ani somoirango neng·nikanirangko man·na nangenga ine Comptroller and Auditor General (CAG) parakatskaaha.
Ia damgittam ADC-rango indita bilsirangna account-rangko name rakkijaengania district council-rango tangka paisa jakkalsretaniko mesokani ong·enga ineba CAG parakataha.
ADC-rango account-rangko rakkijaengani gimin 2022 bilsini March 17 tariko a·dokni Chief Secretary RV Suchiang-na, 2022 bilsini March 23 tariko damgittam ADC-ni chief executive membor-rangna aro March 30 tarikon a·dokni Chief Minister Conrad K Sangma-naba u·iatahachim indiba maming ja·kurangko de·jaha ineba CAG parakataha.
Jagnina sengani ja·man, damgittam ADC-rango somoi gita account-rangko tarijaengani gimin CAG da·o, a·dokni Governor Satya Pal Malik-na seachi u·iatskaaha.
Governor-na sedoatgipa chittio CAG-ni parakatani gitade, 2021 bilsini December 31 tarikona kingkingan ia damgittam ADC-rangni submit ka·kugijagipa ming 10 account-rang dongkuengachim aro uan KHADC-ni ge 2, JHADC-ni ge 3 aro GHADC-ni ge 5 account-rang ong·achim.
Garo Hills Autonomous District Council (GHADC)-ni account-rangko 2016-17 bilsioni 2020-21 bilsiona, JHADC-ni account-rangko 2018-19-oni 2020-21 bilsiona aro KHADC-ni account-rangko 2019-20 bilsioni 2020-21 bilsiona on·kujaenga ine CAG-ni report-o parakataha.
Sixth Schedule-ni Para 7(3)-o dongimin niam gitade, ADC-rangni account-rangko tarigimin format-o rakkina gita nangachim aro iakosa CAG-ni official-rang audit ka·skana nangachim ineba Governor-na seatgipa chittio CAG parakataha.
Ia damgittam ADC-rangon chu·onga gita cashbook, voucher, register, ledger aro uandakgipa lekkarangko name rakkijaengani a·selan project-rang matchotgija dongenga ineba CAG parakataha.