SHILLONG: Meghalaya a·doko dingtang dingtang gadangrangni skulrangko apsan gadangona ra·baaniara a·dok sorkarina dal·begipa ra·biani aro neng·nikani ong·enga ine Budbar salo, a·dokni Education Minister Lahkmen Rymbui parakataha.
‘Educational Vision for North East India & NEP 2020’ ine pangchakaniko done, Asian Confluence-ni gita Union Education Minister of State RK Ranjan Singh baksa agangrikani program-ko ong·atanio a·dokni Education Minister Lahkmen Rymbui aganprakatengon, “India a·songni darang a·dokrangon iandakgipa bewal dongja. Ia neng·nikaniko namatna gita a·dok sorkari aro dingtang dingtang dolrang neng·nikanirangko chagrongna nangenga,” ine parakataha.
Iandakgipa neng·nikanirangko chagrongna nangengoba, skulni managing committee-rang, bak ong·pagipa dolrang aro a·dok sorkari apsan nangrime kamko ka·na nangenga ineba Rymbui aganaha.
Batanggimin bilsignini gisepo Covid-19 sajinmani a·sel bang·bea neng·nikanirangko chagrongna nangaha ine janapatengon, ia COVID-19-ni a·selan chatro chatrirangna internet-rang gita agan-golpogrikna aro skianirangko on·na cholko on·skaaha ine Education Minister parakataha.
Meghalaya a·dokni bang·bata sorkari LP skul nokrangan obosta namsrangjahani gimin lekka poraniko on·anio namen neng·nikanirangko man·na nangenga ineba ua parakataha.
“Namgipa lekka porako on·na gitade namgipa skul nokrangko aro gipin cholrangkoba nanga. Skul nokrang namjani a·selan skulrango smart classroom-rangko kulie on·na man·jaenga. Uni gimin skulrangko namdapataniara namen nangchongmotgipa ong·a,” ine Rymbui aganaha.
A·dokni diltugipa biaprangode network-rangko name man·kujaenga ine janapatengon, bilsignina skangan a·songni Prime Minister Narendra Modi, a·dokna dam 889 gital mobile tower-rangko on·atahachim ine a·dokni Education Minister parakataha.
“Indake ong·genchimoba dingtang dingtang neng·nikanirangko chagrongna nangengani a·sel da·alonan iani 25 percent-koba chu·sokatna man·kujaenga aro iarangan chingni mongsonggipa neng·nikanirang ong·enga,” ine Rymbui aganaha.
Gital Education Policy-o skill development-ni giminba janapaha ineba ua an·tangni kusi ong·aniko parakataha.