AMPATI: South West Garo Hills a·jaoba dontonggija mikkarang waanganichi bang·a songrangon chi banengahani gimin Bristibar salo, All India Trinamool Congress (AITC)-ni dilgipa Mukul Sangma, Ampati aro Betasing jolrango chi banenggipa biaprangko nieaha.
South West Garo Hills a·jao a·a be·dapako man·e mande saksa siangna nangahani giminba Sangma, an·tangni kalimpaaniko parakataha.
“Da·alo nokdang ge·sasan kalimenga ong·ja indiba bang·a nokdangrangan chi banengani a·sel neng·nikanirangko chagrongna nangtokenga. Da·alo nokdang ge·sao a·sel ong·anichi degipa saksako gimaatna nangaha aro ian an·ching pilaknan namen ka·beani ong·enga,” ine chi banenggipa biaprangko nieani somoio Sangma aganaha.
Chirang bananina ua a·gilsakni ding·batroroani aro dingtang ong·baaniko dos gale aganangengon, konta gninamangmang mikka waanganichi ia jolrango namjabee chirang banna a·bachengaha ine AITC-ni dilgipa parakataha.
Iandakgipa a·sel ong·anirangko champengsona man·na gita a·dok aro ma·mong sorkarirang, dingtang dingtang gadangrango kamko ka·na nangenga ineba Sangma aganaha.
“A·gilsakni dingtang ong·rorobaengani gimin manderangna u·iatna aro mikrakataniko on·na nangenga. Basako iandakgipa a·selrang ong·gen darangba agansona man·ja, uni gimin manderang pangnan tarie dongna gita nangenga. Iandakgipa a·sel ong·anirangona an·ching mock drill-rangko dakanichiba an·tangtangko tarisamsona man·a,” ine Mukul aganaha.
Ia a·selni bidingo ua district administration baksa agangrikjringenga aro neng·nikanirangko man·enggipa manderangna dakchakanirangko on·engani gimin mittelna ska ineba Mukul Sangma parakataha.
