AMPATI: South West Garo Hills a·jaoba dontonggija mikkarang waangani a·sel Bristibar salona kingking dam 26 songrangko chi banaha aro badiaba badiaba biaprango a·arang be·dapanichi mande saksa janggiko gimaatna nangaha ine official-rang kobor on·aha.
Official-rangni u·iatani gitade, South West Garo Hills a·jaoba dontonggija mikkarang waangani a·sel dam 26 songrangko chi banaha aro uandaken a·ja gimikni sak 890-na baten manderang neng·nikanirangko man·tokengaha.
Budbar walonin mikkarang dontonggija waangani a·sel Betasing C&RD Block-ni ning·o donggipa Sonamati songo a·a be·dapako man·e mande saksa janggiko gimaatna nangaha ine official-rang u·iataha.
Official-rangni u·iatani gitade, mikkarang jimbee waanganichi South West Garo Hills a·jao nok te·gittamde chu·gimik nosto ka·ako man·aha aro te 43 nokrangde adita nosto ka·ako man·skaaha.
Mikkarang dontonggija waanganichi South West Garo Hills a·jani badiaba badiaba health centre ba manderangko sanchakgipa biaprangoba chirang banaha aro uandaken Rerapara C&RD Block-ni ning·o donggipa Mellim sub-centre-ko chi bananio, ia sub centre-o kam ka·enggipa nurse sakgni, jachange dongna gita nangahachim indiba ja·mano songni manderang, ia nurse sakgniko jokatna man·aha ine kobor on·aha.
South West Garo Hills a·jao chirang banani a·sel manderangna chirangko sale on·enggipa pumping machine-rangba nosto ong·atako man·aha aro uandaken da·o dipet manderangna chirangko sale on·na man·kujaengoba ta·raken chiko sale on·na man·na gita kamko ka·engaha ine Ampati PHE-ni executive engineer parakataha.