TURA: Petrol aro diesel-rango chirangko brine palenga ine manderangni badi ka·anirangko man·soahani gimin Tura Sadar Division-ni ning·o donggipa petrol pump-rango petrol aro diesel-rangko name sandirokna gita dingtangmancha Joint Inspection Team-ko songaha ine West Garo Hills a·jani Deputy Commissioner Swapnil Tembe u·iataha.
Batanggimin salrangonin Garo Hills-o aro mongsongbate Tura jillao donggipa mitam petrol pump-rangoni petrol breon, petrol-o chirangko man·enga ine manderang badi ka·dotokengachim ine nikna man·a.
Indake ong·engon, petrol-rango chirangko brine palenga ine matnanganiranga kakket ong·ama ong·ja uko tale ma·sie ra·na gita dingtangmancha Joint Inspection Team-ko songaha aro ia inspection team-ko Tura-ni EAC Saljagring G Momin dilanggen ine DC u·iataha.
Ia inspection team-o Indian Oil Corporation Limited-ni area field officer, Legal Metrology-ni inspector aro Tura Supply office-ni inspecting officer-rangba dongpae bak ong·anggen ineba DC u·iataha.
