Garo Hills-o mikkarang jime waanganichi sak 4 sianga, adita bolni dolongrangko chi pe·anga

TURA: Batanggimin salrangonin Garo Hills-o dontonggija mikkarang waanganichi, biap damgnio nokko a·a rurongdape, mande sakbri so·otako man·aha aro mande saksa bilongbee saknaanirangko man·na nangaha.
Ia a·sel ong·ani Budbar walo, Gambegre Block-ni ning·o donggipa Jebalgre songo aro South West Garo Hills a·jani Betasing Block-o ong·aha.
Koborko on·ani gitade, mikkarang dontonggija waanganichi, Jebalgre songo nokdang ge·sako a·a rurongdapaha aro a·a rurongdapa man·e ia nokdangni mande sakgittam so·otako man·aha aro saksa bilongbee saknaanirangko man·skaaha.
Apsan daken Betasing Block-oba, Budbar walon a·a rurongdapa man·e mande saksa siangna gita nangaha ine kobor on·aha.
Ia a·selrang ong·ani ja·mano, bakan district-ni official-rang, dakchakanirangko on·na gita a·sel ong·gipa biaprangona manderangko watataha.
Koborko on·ani gitade, South Garo Hills a·jaoba bang·en a·a ruronganirangko nikna man·aha aro da·o dipet official-rang, a·sel ong·gipa biaprango manderangna dakchakanirangko on·na a·bachengaha.
Indake ong·engon, Dalu Police Station-ni ning·o, Gilmatdam aro Dombagre songrangko nangdimeatna Bandra chibimako kabatgipa dolongkoba chirang dal·bae pe·angaha ine kobor on·aha.
Ia dolongara Gilmatdam aro Dombagre songrangni mongsonggipa dolong ong·achim aro da·o ia dolongko chi pe·angahani gimin songni manderang re·a doanirango neng·nikanirangko man·tokengaha ine kobor on·timgiparang parakataha.
Apsan daken, Kherapara Outpost-ni ning·o donggipa Morop Bazar aro Makalgonchu songrangoba bolgni dolong ge·gniko chi pe·angaha ine kobor on·timgiparang u·iataha. Ia dolong damgnian Bandra chibimako kabatgipa bolni dolongrang ong·achim.
Mikkarang dontonggija waangani ja·man West Garo Hills aro South West Garo Hills a·jarangoba chirang dal·bae, bang·bata songrangon chi banna a·bachengaha aro ia biaprangko district administration aro disaster management-ni official-rang, nirok sandina a·bachengataha ine kobor on·aha.
Indake ong·engon, Garo Hills-o mikkarang jime wakuna sienga ine u·iataniko man·soahani gimin chiring sambarango aro a·dramrango donggipa manderangko mikrake dongchina gita West Garo Hills a·jani Deputy Commissioner Swapnil Tembe u·iataha.