TURA: Salgnina ong·atenggipa Tura Industrial Fair-ko, Bristibar salo, West Garo Hills a·jani Deputy Commissioner Swapnil Tembe, Dakopgre-o donggipa SMELC building-o a·bachengate on·angaha.
Jolo bading chiwale cha·enggipa manderangko ra·dona aro uamangni bosturangko palna sim·na gita ia Industrial Fair-ko Tura-ni District Commerce & Industries Centre (DCIC)-ni gita salgnina ong·atengachim.
Ia Industrial Fair-ko ong·atanio Garo Hills-ni dingtang dingtang biaprangoni bading chiwalgiparang, an·tangtangni bosturang, jekai mingsinggipa Nokrek-ni bija bitchi, jaktangchi tarigipa karitchi, cashewnut, an·tangtangni wate chenge tarigipa bosturang, A·chikrangni Dakmanda, ba·ra kancharang aro dingtang dingtang bosturangko ra·bae bakko ra·tokenga.
Ia Industrial Fair-ko Sukrobar saloba pring 10:00 bajionin kuliangtaigen aro gisiko nanggipa manderang, SMELC building-ona re·ange an·tangtangni namnikgipa bosturangko bree ra·bana man·gen ine official-rang u·iataha.
