SHILLONG: Re·baenggipa 2023 bilsini Meghalaya Legislative Assembly election-na dingtang dingtang political dolrangan tarisamsotokengahaon, United Democratic Party (UDP) dolba ia election-na skanggipa candidate list-ko re·baenggipa July jani 7 tariko parakatgnok ine u·iataha.
Bristibar salo, UDP-ni central executive committee tom·a matchotani ja·man kobor ra·timgipa manderang baksa agangrikengon, krabatgipa candidate-rangna tikitrangko on·na man·na gita UDP-ni state election committee-ko songe donangaha ine UDP-ni president Metbah Lyngdoh parakataha.
“Da·o dipet chinga dam 29 seat-rangna, chingni MLA-rang aro gipin dolni MLA-rangko man·chape candidate-rangko seokmanaha,” ine Lyngdoh parakataha.
Gipin political dolrangni sakdok MLA-rang UDP-o napna tarimanaha ineba UDP-ni president parakataha indiba ia MLA-rangni bimingrangko ua parakna jechakskaaha.
Re·baenggipa 2023 bilsini Assembly election-na skang, dingtang dingtang political dolni MLA-rangba UDP-o napna miksongenga ine adita salrangna skangsan Metbah Lyngdoh parakatahachim.
Comments are closed.