SHILLONG: Meghalaya a·dokni adhoc skulrango skigiparangni dabianirangko knachakjaengani gimin Federation of All School Teachers of Meghalaya (FASTOM), a·dokni Chief Minister Conrad K Sangma-na sedoatenba, jingjengatanirangko a·bachengpiltaina ka·mikkenataniko on·angaha.
Adhoc skulrango skigiparangni dormahako gong 18,000-chi bariatchina aro bilsiantian 5 percent ka·e bariatchina dabianiko sorkari knachakjagenchimode, dontonggija jingjengatanirangko dakanggen ineba FASTOM-ni dilgiparang ka·mikkenataniko on·angaha.
“Chinga indita somoirangna sengchae dongaha indiba sorkari chingni dabianiko knachakteljaenga. Uni gimin chinga da·o gittamgipa Cabinet tom·anina bon·kame senge nigen aro iano chingni dabianirangko ra·chakjagenchimode chinga dontonggija jingjengatna a·bachenggnok,” ine FASTOM-ni dilgipa Mayborn Lyngdoh parakataha.
Adhoc skigiparangni dabianiko chu·sokatna gita May 12 tarikona FASTOM, sorkarina somoiko on·ahachim indiba association-ni dongimin somoi gita chu·sokatjahani gimin association-ni dilgiparang, a·dokni Chief Minister-ko gronge agangrikangtaiaha.
Re·anggipa June-ni 9 tariko gnigipa Cabinet tom·ani ja·man Chief Minister-ni agangipa kattarangnaba FASTOM-ni dilgiparang, suk ong·gijaniko parakataha.
Lyngdoh-ni parakatani gitade, skigiparangni dabianirangko sorkari, changgittamna Cabinet tom·anirango chanchienba tik ka·na gitasa songgigrikahachim indiba da·o skigiparangni dormaharangko bariatna gitade, krorni kror tangkarangko nanggen aro gipin department-rangni budget-ko komiatskana nanggen ine chief minister aganskaengahachim.
“Iano asol neng·nikanide skigiparangni ong·ja indiba a·dok sorkari aro sorkarini dingtang dingtang department-rango kam ka·enggipa manderangsa ong·a. Adhoc skulrango skigiparangna batanggimin bilsidokonin dormaharangko bariatkujaenga aro iandake adhoc skigiparangni man·gniko jechakaniara namen kragijani ong·enga,” ine FASTOM-ni dilgipa parakataha.
Indake ong·engon, skigiparang da·o gittamgipa Cabinet tom·anina bon·kame sengkugen aro iano sorkari maming aganchakaniko on·jagenchimode dontonggija jingjengatanggen ine Lyngdoh, skigiparangkoba ramarango tusina tarie dongchina gita didiataha.