Allowance-rangko bariatchina ministerial officer-rang dabia

TURA: Sorkario kam ka·enggipa ministerial officer-rangni dingtang dingtang allowance-rangko bariatchina didie, re·anggipa June 12 tariko All Meghalaya District Ministerial Officers Association (AMDMOA) West Garo Hills-ni membor-rang, a·dokni Chief Minister Conrad K Sangma-na memorandum-ko on·angaha.
Ia sal somoirango pilak nangchongmotgipa bosturangni damrangan tang·doengahani a·sel sorkario kam ka·e cha·enggipa manderangba neng·nikanirangko chagrongna nangtokengaha ine AMDMOA West Garo Hills-ni membor-rang janapatenba, uamangni dingtang dingtang allowance-rangko bariatchina a·dokni Chief Minister-ko mol·molataha.
AMDMOA West Garo Hills-ni parakatani gitade, Children’s Education allowance-ko bilsiprako gong 11,000/-oniko gong 16,000/-ona, medical allowance-ko japrako gong 1,000/-oniko gong 5,000/-ona, Hills allowance-ko japrako gong 500/-oniko gong 3000/-ona aro Festival advance-ko bilsio gong 7000/-oniko gong 10,000/-ona bariatchina gita uamang Chief Minister-ko mol·molataha.