SHILLONG: Sorkarini kosako ku·rangko on·anio maming dakgualani ong·ja aro ian BJP dolni pal ku·rang on·anisan ong·aia ine Mongolbar salo, Meghalaya Cabinet-ni gitcham minister aro BJP dolni MLA AL Hek parakataha.
Sorkarini kosako matnanganirangko dakjachina gita BJP-ni sakgipin MLA Sanbor Shullai aganahani gimin Hek, ia kattarangko parakatskaaha.
Da·o dipet Meghalaya a·doko Sanbor Shullai aro AL Hek sakgnian BJP-ni MLA-rang ong·engachim aro BJP dolba NPP-chi dilenggipa MDA sorkarini bak ong·paengachim ine nikna man·a.
“Badiaba somoirangode sing·anirangna aganchakanirangko on·na nanga aro aganchakaniko on·aiani giminde anga an·tangni gitasa aganenga ong·ja indiba ian doltangni gitasa ong·enga,” ine Sanbor Shullai-ni agangipa kattarangna Hek parakatskaaha.
An·tangni minister ong·engmiting somoirangode jrip dongenba da·o Cabinet-oni ra·ongkatako man·ani ja·manosa sorkarini kosako ku·rangko on·enga ine Shullai, Hek-ko matnangatahachim.
Shullai-ni iandake matnanganina aganchakaniko on·angskaengon, “An·ching dilgipa ong·e iako ma·sina nanga aro an·tangtangni ma·siako mesokna nanga. Anga ba Sanbor Shullai ba party-ni president maikoba aganengon, chinga iako dolni palsa aganenga aro dolni pal agananiora mai ong·gijani donga?” ine Hek sing·doangaha.
Uni minister ong·engmiting somoirango sorkarini kosako ku·rang on·jachim ine matnanganiko jegalatengon, ua Cabinet-ni tom·anirangoba pangnan nangchongmota kamrangnade ku·rangko on·rongaiachim ine Hek parakataha.
“Anga Cabinet tom·anirango ku·rangko on·paaha aro mitam kamrangode nipiltaichina gita Cabinet-ko aganahachim,” ine Hek aganaha.