RESUBELPARA: POCSO Act 2012-ni ning·o kragija dake kal·akako man·gipa bi·sarangna simsak nirokaniko on·ani bidingo North Garo Hills a·jani doctor-rangna aro police officer-rangna talate on·aniko dakna gita Bristibar salo, North Garo Hills a·jani District Legal Services Authority (DLSA) aro District Child Protection Office-ni gita sensitisation program-ko ong·atangaha.
Ia program-ko ong·atanio Chief Judicial Magistrate aro District Legal Services Authority-ni Secretary, jinmana aganprakengon, ia program-o apsan chanchirimanichi skie on·gipa manderangni dakmesokaoniko ia program-o bak ra·gipa pilakan ma·sie ra·na man·gen ine an·tangni ka·dongchakenganiko parakangaha.
Ia program-ko ong·atanio North Garo Hills a·jani DSP Ravi Sangma, kragija dake kal·aka man·gipa bi·sarangna dakchakanirangko on·anio police officer-rangni dakna nanggni kamrangko aro District Child Protection Officer Salnam Momin, doctor-rangni dakna nanggni kamrangko agan-talate on·angskaaha.
Ia tom·anio Legal Aid Counsel Betsy Ch Momin, victim compensation scheme-ni bidingo talataniko on·angskaenba, Legal Services Authorities Act 1987-ni ning·o kal·aka man·gipa bi·sarangna ainni gita aro gipin kamrangchi dakchakanirangko on·anio DLSA-ni kamrangni gimin agan-talate on·angaha.
