Mikkarang jimbee waangani ja·man Garo Hills gimikon chirang banna, a·arang be·a

TURA: Batanggimin salrangonin mikkarang warongengani a·sel aro Sukrobar pringwalonin dontonggija mikkarang jimbee waangani ja·man, Garo Hills gimikon chirang dal·bana a·bachengaha aro bang·bata biaprangon chi bananirangko aro a·arang be·anirangko nikna gita man·angaha.
Ia chang a·sel ong·anirangko South Garo Hills a·jao bang·bate nikna gita man·aha, jeon mande sakbri a·a be·dapa man·e janggitangtangko gimaatna nangaha.
South Garo Hills a·jao Simsang chibima dal·baenba, Baghmara, Rongara aro bang·bata biaprangon chirang banna a·bachengaha aro biap damgnio mongsonggipa dolong ge·gittamko chi pe·angani ja·man NH-62 ramaba champengatako man·angaha. Ia dolong ge·gittamoni ge·sade Karukol-o, ge·sade Rongdik-o aro ge·sade Rongara-ona dakanggipa ramani dolong ong·achim.
Bristibar walonin mikkarang dontonggija jime waanganichi Sukrobar pringode Simsang chibima dal·baaha aro Baghmara-ni Simsang dolongkon mripna sipilahachim.
Simsang chibima dal·baani ja·man South Garo Hills a·jani ongipa pilak biaprangon chi bananirangko nikna man·aha.
South Garo Hills a·jao a·a be·dapa man·e sianggipa mande sakbrioni sakgittamde, Baghmara-ni Bolsalgre gittimo donggipa nokdang ge·sani manderang ong·achim aro saksade Siju-o ong·achim.
Baghmara-ni Bolsalgre gittimo a·a be·dapa bakan jolni manderang ia nokni manderangko ra·ongkatna jotton ka·ahachim indiba uamangko ra·ongkaton sakgittaman janggi galmanahachim. Ia mande sakgittamara Tengkam Sangma, Gamchi Sangma aro uamangni me·a bi·sa ong·achim.
Siju-oba nok te·sako apsan salon a·a be·dapaha aro a·a be·dapako man·e ia nokni me·chikma saksa siangna gita nangaha.
Jolo songdongenggipa manderangni parakatani gitade, Nongalbibra-ona dakanggipa NH-62 ramao a·arang be·anichi aro chirang dal·anichi Siju-ona re·a doani cholrang da·o dipet dongsrangjaha.
Karukol aro Rongdik dolongrangko chi pe·angani a·sel Siju-oni Baghmara-ona re·a doani cholrangba dongjaha ine kobor on·timgiparang parakataha.
East Garo Hills a·jaoba mikkarang jime waangani ja·man badiaba badiaba biaprango a·a be·anirangchi ramarang champengatako man·angaha indiba ia koborko seatengmiting somoiona kingkingde East Garo Hills a·jao obostarang adita namkalengachim. East Garo Hills a·jaoba Simsang chibima dal·rorobaengani gimin aro mikkarang wakugniko mikrakatsamsoanirang dongani gimin kenchaksoanirang dongenga ine official-rang parakataha.
Sukrobar pringo, Nengkhra-oni Williamnagar-ona dakanggipa ramao a·arang be·e adita somoirangna rama champengatako man·ahachim indiba bakan ia ramako rongtalate gari re·na gita on·piltaiaha ine kobor on·aha.
West Garo Hills a·jaoba mikkarang jimbee waangani ja·man, bang·bata biaprangon chi bananirangko aro a·a be·anirangko nikna man·aha.
Koborko on·ani gitade, Mebitpara-o a·a rurongdapani ja·man Purakhasia-oni Salmanpara gita Ampati-ona dakanggipa PWD rama champengatako man·aha aro Chenggapara, Jibalgre jolrango a·arang rurongdape, Purakhasia-oni Gambegre gita Tura-ona dakbagipa ramaba champengatako man·aha.
Selsella jolrango chirang banahani gimin ia rama gita gari gorarangni re·ruraaniko champengatchengaha ineba koborko man·soaha.
Phulbari-Bhaitbari aro Rajabala jolrangoba Brahmaputra chibima dal·bae chirang banna a·bachengaha ine kobor on·aha.
South West Garo Hills a·jaoba mikkarang jimbee waangani ja·man, Tura-oni Garobadha-ona dakanggipa bang·bata ramarangon chi bananirangko nikna man·aha aro mitam biaprangode a·arang be·dape re·a doanirango neng·nikanirangko man·angtokaha.
Re·baenggipa June 21 tarikona kingkingan mikkarang jime wagniko u·iatsamsoanirang dongani gimin a·dokni pilak manderangkon aro mongsongbate chisamrango donggipa manderangko mikrake dongchina sorkari u·iataha.