TURA: Garo Hills-o mikkarang dontonggija waenganichi bang·a biaprangon a·sel ong·anirangko aro manderangni sianirangko nikna man·engani gimin re·baenggipa June 21 tariko World Music Day-ko maniani bak gita program ong·atna manchianiko dontongatchengna nangenga ine Nishangram Eco-Tourism and Livelihood Cooperative Society (NETLCS) u·iataha.
Re·baenggipa June 21 tariko World Music Day-ko maniani bak gita Nishangram-o ‘How Great Thou Art’ Hymnal Ensemble, Singing Competition Grand Finale aro attamo Riprap aro Incipit dolrangni concert-ko ong·atna manchisoahachim ine nikna man·a.
Indake ong·genchimoba, Garo Hills gimikon da·ororo mikkarang dontonggija waengani a·sel dingtang dingtang a·sel ong·anirangko aro mande sianirangko nikna man·engani gimin ia program-ko dontongatchengenga ine kobor on·aha.
Ia program-ko ja·mano sal nirokenba ong·atangskagen ineba NETLCS u·iataha.
