TURA: Raksamgre Civil Sub-Division-ni ning·o donggipa Pedaldoba jolrango mikkarang jimbee waanganichi neng·nikanirangko man·enggipa dingtang dingtang songni manderangna dakchakanirangko on·china gita Garoland State Movement Committee (GSMC) Pedaldoba regional unit, West Garo Hills a·jani Deputy Commissioner Swapnil Tembe-ko didiataha.
GSMC Pedaldoba regional unit-ni chairman Rimjen Ch Sangma-ni parakatani gitade, Pedaldoba jolrango chi bananichi rama jal·langrang, bijoli krongrang aro nokrang bang·en nosto ong·atako man·aha indiba da·onan department official-rang, ia songrangona re·ange niea dongkujachim.
“Ia songrango rama jal·langrang, bijoli krongrang aro nokrangsan ong·aigija manderangni gama ge·ani, jilla kaani aro ma·manti gam-jinrangko gimaatna nange, songni manderang duk mikchirangko chakna nangtokenga indiba da·onan ia songrangko nangchakegipa department-ni officer-rang re·ange nia dongkujaenga,” ine Sangma parakataha.
Pedaldoba-oni Rongai-ona dakanggipa NEC rama, Rongsai bazar sambao be·wakaha ine talataniko on·angengon, ia rama nosto ong·aniko nikengoba, Raksamgre constituency-ni MLA Benedic Marak aro gipin dilgiparang, mikkangtangtangko dongnue dongtokenga ine GSMC Pedaldoba regional unit-ni chairman matnangataha.
“Uni gimin duko ga·akenggipa manderangna pilak nanga dakchakanirangko aro cha·ani ringanirangko sokate on·china West Garo Hills-ni DC-ko mol·molatenga,” ine Sangma parakataha.
Pedaldoba jolrango neng·nikaniko man·enggipa songrangna dakchakaniko on·china GSMC didia
Date:
Share post:
