TURA: Mikkarang jimbee waanganio chi bananirangchi aro a·arang be·dapako man·anichi neng·nikanirangko man·enggipa manderangna apsan nangrime dakchakanirangko on·china gita Tura-ni MDC Bernard N Marak didiataha.
Neng·nikanirangko man·enggipa manderangna dakchakanirangko on·anio volunteer-rangko nanggenchimode dakchakanirangko on·na man·aigen ineba Marak parakataha.
“Neng·nikanirangko man·enggipa manderangna dakchakanirangko on·na gita dingtang dingtang department-rang raken kamko ka·enga indiba iandakgipa obostarango songo noko donggipa manderangna dakchakani kamrangko namdapatna nangenga. Iandakgipa obostarango manderang sanona re·ange dakchakanirangko bi·gen, ma·sijae jajatokenga. Uni gimin neng·nikanirangko man·enggipa manderangna dakchakna gita jinmaonikoba volunteer-rangko seokna nanga aro pilak block-rangon helpline-rangko donna nanga,” ine Tura-ni MDC parakataha.
Ia a·selko namen nangchongmotgipa dake ra·china aro pilak a·jarang baksana block-rangoba emergency response team-rang baksana volunteer-rangko songchina gitaba Marak, a·dok sorkariko didiataha.
Dingtang dingtang department-rang, jekai medical, power aro gipinrangkoba pangnan manderangna dakchakanirangko on·na tarie dongchina didiatengon, dakchakanirangko nangenggipa nokdangrangna pilak nanga dakchakanirangko on·china gita Marak, dingtang dingtang dolrangko aro volunteer-rangko didiataha.
Chi banani aro a·a be·dapanirangchi duko ga·akenggipa manderangna ta·raken tangka paisarang baksana pilak nanga dakchakanirangko on·china gitaba Marak didiataha.
