SHILLONG: Mikkarang dontonggija jime waangani a·sel East Jaintia Hills a·jani Lumshnong jolo NH-6 ramani mitam bakrangko a·arang be·dapahani gimin aro mitam biaprango ramarang be·wakangahani gimin Robibar salo, ia ramako a·dokni Chief Minister Conrad K Sangma re·ange nieaha.
Ia ramako nieani somoio a·dokni Chief Minister baksana Home Minister Lahkmen Rymbui, district administration-ni official-rang aro PWD baksana NHAI-ni official-rangba dongpaeaha.
Ia ramako nieani ja·man kobor ra·timgipa manderang baksa agangrikengon, mikkarang jime waanganichi be·wakanggipa ramarangko aro a·a be·dapgipa ramarangko ta·raken taripile on·na aro ramao jachange dongenggipa garirangko watna jotton ka·enga ine Chief Minister parakataha.
“Ia ramako taripile garirangko watna jotton ka·enga indiba mitam biaprangode mikkarang waengkuani a·sel kamrangko ka·anio neng·nikanirangko man·na nangenga,” ine Chief Minister aganaha.
Chief Minister-ni parakatani gitade, konta 24-ni gisepon ia ramani mitam bakrangkode taripilna man·gen ine ka·dongengani gimin ia rama gita chonchongipa garirangkode watna man·gnok.
Mikkarang komiangahaode konta 72-ni gisepon dal·dalgipa garirangkoba aro mongsongbate nangchongmotgipa bosturangko salruraenggipa garirangkoba watna man·gnok ineba Chief Minister parakataha.
Ia ramaona chirang jokbae ramarangko nosto ka·engani gimin chiko dingtang biap gita watskana jotton ka·enga ineba Chief Minister aganaha.
“District Administration aro dingtang dingtang department-rang somoi batpile kamrangko ka·tokenga aro uamang ia ramako watpilnasan ong·aigija ramao jachange dongna nangenggipa manderangna pilak nanga bosturangko sokate on·naba kamrangko ka·enga,” ine Sangma aganaha.
Ia ramao jachange dongna nangenggipa manderangna ma·manti bosturangko aro mongsongbate cha·ani ringanirangko sokate on·engani gimin ua dingtang dingtang dolrangkoba mittelpilataha.
“Anga bebera·a an·chingni nangrime ku·cholsan kamko ka·anichi bakan ia obostako skango gitan ong·atpilna man·chongmotgen,” ine Chief Minister aganaha.
