TURA: South Garo Hills a·jaoba mikkarang jimbee waanganichi chi banani aro a·a be·dapanirangko nikangna gita man·ahaon, Robibar salo mande saksani manggisiko man·daptaiaha aro ia mandeko channe South Garo Hills-o mande siani da·o sakbonga gapengaha.
Koborko on·ani gitade, ia mande saksani manggisiko man·an baksana gipin sakgni manderangba Nongalbibra jolo donggipa Rongsa Awe songo gimakuenga aro ia mande sakgnikoba songni manderang, siahakon ine chanchichipenga.
Ia mande sakgnini manggisirangko man·genchimode South Garo Hills-o mande siani batangkugen ineba official-rang parakataha.
Robibar salo man·gipa manggisiara Kharkutta-oni Sengman Sangma minggipa mandeni manggisi ong·achim ine kobor on·timgiparang u·iataha.
Kobor on·timgiparangni u·iatani gitade, ia mande sakgittamara, Rongsa Awe songo gama ge·anirangko nirokenggipa manderang ong·achim aro ua somoio uamang ua biapon mikka chakengachim. Uamangni mikka chakengmiting somoio rang·gitik kosakoni a·arang rurongbae uamangni mikka chakenggipa biapko be·dapeaha aro uamang sakgittamkon a·a dapaha. A·a dapako man·gipa sakgittamoni saksakode Robibar salo man·aha aro sakgnikoba jolni manderang, police-rangni dakchakanichi sandiengkua ine u·iataha.
South Garo Hills a·jani SP Rithuraj Ravi-ni u·iatani gitade, ia a·selni bidingo ja·manchakesa police-rangna u·iatahani a·sel ia biapo a·a dapa man·gipa manderangko sandianio ja·manchakskaahachim.
Ia a·sel ong·ani re·anggipa June 17 tarikon ong·ahachim indiba ia biap a·a dapa man·gipa mande saksani manggisiko Robibar salosa man·skaahachim.
Batanggimin antirangonin mikkarang dontonggija waangahani a·sel Garo Hills gimikon chi bananirangko aro a·a be·anirangko bang·en nikna gita man·aha aro Garo Hills-ni dingtang dingtang biaprango adita sak manderang siangna gita nangahachim.
Indake ong·engon, South Garo Hills a·jani Siju-ona dakanggipa rama dilgnian champengatako man·ahani a·sel songni manderang, re·a doanirango neng·nikanirangko man·tokengaha ine jolni manderang u·iataha.
Siju-ona re·enggipa gari gorarang dongjani a·selan manderang, an·tangtangni nanga kamrangna ja·arangchisa chel·a biaprangona re·na nangtokenga ineba jolni manderang u·iataha.