NEHU Tura campus-ni nanganirangko knachakjaengani gimin NGO-rang jingjengattaina ka·mikkenata

TURA: North Eastern Hill University (NEHU) Tura campus-ni dingtang dingtang nanganirangko chu·sokate on·china dabianirangko knachakjaengani gimin Zikku Balgra N Marak-chi dilenggipa Garo Students Union (GSU) CEC baksana Post Graduate Students Union (PGSU), gital dake jingjengatpiltaina ka·mikkenataniko on·angaha.

NEHU Tura campus-na pro vice chancellor-ko songe on·an baksana NEHU Tura campus-ni dingtang dingtang nanganirangko chu·sokate on·china gita batanggimin somoirangonin ia dolrang dabitokengachim ine nikna man·a.

Iani bidingo, ia dolgni NGO-rang baksana dingtang dingtang dolrangni nangrime bikotgipa All Garo Hills Joint Action Committee (AGHJAC)-ni gitaba NEHU Tura campus-o jingjengatanirangko dakangahachim aro Shillong-o NEHU-ni Pro Vice Chancellor Prof Prabha Shankar Shukla-koba grongahachim.

Indake ong·genchimoba, NGO-rangni dabiani gita NEHU Tura campus-ni nanganirangko knachakna gisiko nangjaengani gimin ia NGO-rang, salsni somoiko on·angaha aro ia salsnini gisepo NGO-rangna maming aganchakanirangko on·jagenchimode jingjengatanirangko dakna a·bachengatpiltaigen ine mikrakataniko on·angaha.

“Chingni dabianirangko knachakjaengani gimin chinga da·aloni a·bachenge salsni somoiko on·enga aro ia salsnini gisepo chingni dabianirangna maming aganchakanirang dongjagenchimode chinga jingjengatanirangko a·bachengatana agre maming gipin chol dongjawaha,” ine GSU-CEC-ni president Zikku Balgra Marak parakataha.

Marak-ni parakatani gitade, batanggimin somoirango uamangni official-rangko grongani somoirangoba uamangni dabianirangko chu·sokate on·na ku·rachakanirangko on·ahachim indiba da·alonan maming kamrangkon chu·sokata dongkujaengachim.

Get real time updates directly on your device, subscribe now.

Comments are closed.