SHILLONG: Bharatiya Janata Party (BJP) a·songo uandake a·songni bang·bata a·dokrango bil gnange sason ka·na man·genchimoba, aro a·songo jegita bilakgipa party ong·genchimoba Meghalayaode BJP jegalako man·engkua.
2013-14 bilsi jolo BJP bilakgipa ong·mitingomangba, 2013-o Meghalaya Assembly election-o seat ge·sakoba chena man·rikjaha.
BJP, a·songo sason ka·a da·o bilsi 8 ong·pilongmangba 2018 Assembly poll-oba ge·gni seat-rangkosan cherikaia.
Salgro Salaram a·dokrangona BJP bil gnange napbana man·oba, maina Meghalayao bilakna man·jaenga, a·selara mai ine sing·on, BJP-ni Meghalayao bilakna man·gijanide mongsonggipa minggni a·selrang donga ine BJP State president, Ernest Mawrie aganaha.
“Meghalayao BJP sason ka·ode, giljarangko chipattokgen aro manderangko matchu be·en cha·na champenggen ine gipin political party-rangni election-mitingo campain ka·mitingo manderang gipatani gimin ong·enga,” Mawrie aganaha.
A·song bilsi chetna BJP-ni sason ka·ani da·o dipet darang giljakoba chipatkuja aro matchu be·en cha·aniko champengata dongja aro saffron party, secularism-o bilaken bebera·a, ua aganaha.
“Chinga pilak toromkon mandera·a, chingni gisepo maming jat-ma·mal baseani dongja,” da·ode manderang, mongsongbate songadamrango BJP-rangko ra·chakangtokengjok, maina Ma·mongni scheme-rangko da·o man·angtokengjok, Mawrie aganaha.
