SHILLONG: Garirango glass gisimrangko chattekani gimin matnange agantokengon, garirango glass gisimko chattekaniara VIP-rangni naljokgnina ong·a aro politicianrangde uamangni garirango glass gisimrangko chattekna nangao ga·aka ine Deputy Chief Minister Prestone Tynsong chakpae aganaha.
Indake dakaniara Supreme Court-ni rai on·gipako pe·a ga·kajama ine sing·on, kattako jujaate, manderang walosa songrebatani gimin glass gisimko chattekara naljokani donga ine Tynsong aganaha.
“Driver-ming na·asan ine manderang nikgen, unode mai obosta ong·gen ukode na·an u·ia. Ning·achiko nikprotatjaode, denggu dakgiparang, gari ning·o silchidare ra·bitgiparang donggen ine chanchigen. Unigimin glass gisimko chattekan nambatgipa ong·aigen ine anga chanchia,” minister aganaha.
Ua indakeba aganaha je sawarang uamangni garirango glass gisimko chattekna man·gen uko sorkari bak dakmanaha.
Koborrango gita, State Security Commission-ni on·gipa Z+ ba Z category security-ko man·gipa VIP-rangsan glass gisimrangko chattekna man·ani ong·achim.
Shillong songjinmani ramarango nangai nangjai garirango glass gisimrangko chatteke saltokenga ine koborrangko man·ani ja·mano, ra·galtokchina aganaha ong·jaode niam pe·giparang dai gamna nanggen ine Traffic Police mikrakataha.
Indake ong·engon, Motor Vehicles Act-o pangchake garirango gisim glass chattekaniko Supreme Court-an April 27, 2012 bilsion champengatahachim.
Get real time updates directly on your device, subscribe now.
Comments are closed.