SHILLONG: NPP-chi dilenggipa Meghalaya Democratic Alliance (MDA) sorkari, ma·mong sorkarini ra·gate on·enggipa scheme-rangko name kam ka·jaenga aro scheme-rangko man·na gitaba proposal-rangko on·jaenga ine Minority Affairs-ni Union Minister of State (MoS) John Barla parakataha.
Meghalaya a·doko tangka paisa jakkalsretanina aro ma·mong sorkarini ra·gate on·gipa scheme-rangko manderangona sokate on·jaenga ine a·dokni BJP dol, NPP-chi dilenggipa MDA sorkariko changni chang matnangengachim ine nikna man·a.
Indake ong·engon, Union Minister of State-ni iandake a·dok sorkarini kamko parakataniara a·doko BJP dolko bilakbatatani gita ong·gnok ine a·dokni BJP dilgiparang parakatskaaha.
“Meghalaya a·doko ma·mong sorkarini bang·a scheme-rangan sokbajaenga ine anga nikna man·aha. Ma·mong sorkarini scheme-rangko manderangni namgninasa ra·gatahani gimin scheme-rangko name kam ka·na nanga aro iako nina gitasa anga Meghalaya-ona re·baaha,” ine Barla, Shillong songjinmani BJP office-o kobor ra·timgiparangna aganaha.
Meghalaya a·doko ma·mong sorkarini dingtang dingtang scheme-rangni gimin manderang mamingkon ma·sitokjaenga aro bang·a scheme-rangkon a·dok sorkari ra·bakujaenga ineba Union Minister matnangataha.
Meghalaya a·dokni namroro silroroanina Delhi-ona re·ange dingtang dingtang proposal-rangni bidingo agangrikchina ua a·dokni Health Minister James PK Sangma-ko aganmanaha ineba Barla parakataha.
Union Minister-ni parakatani gitade, uni ministry-ba a·dokna residential skulrangko, hospital-rangko, health centre-rangko, community hall-rangko, me·chikrangna dingtang dingtang cholrangko aro smart classroom-rangkoba kulie on·na bil dongachim.
“Iarangko man·na skang indiba proposal-kode on·chengna nanga,” ine Barla aganaha.
Uni ministry, a·dokna gong kror 247-ko chamatmanaha aro ia tangkarangchi stadium-rang, health centre-rang aro dingtang dingtang kamrangko a·bachengengaha ine janapatengon, proposal-rangko on·dapatkuchina gita ua a·dok sorkariko didiangaha.
Ma·mong sorkarini scheme-rangko Meghalaya a·dokna 9:1 ratio-o on·enga ine talatangengon, ia scheme-rangna ma·mong sorkari 90 percent-ko aro a·dok 10 percent-kosan gamna nangaia ine Barla parakataha.
