SHILLONG: Shillong-o donggipa North Eastern Hill University (NEHU)-ni Vice Chancellor Prof Prabha Shankar Shukla, Bristibar pringo, COVID-19-na porikka ra·e nianio positive ong·aha.
COVID-19-na porikka ra·anio positive ong·ani ja·man Prof Shukla-ko Shillong songjinmani Nazareth Hospital-o donataha.
Iani bidingo Nazareth Hospital-ni official-rango sing·sandiaton, da·o dipet Prof Shukla namen dongenga ine parakataha.
Mongolbar salo, NEHU-ni University Yoga Committee aro National Service Scheme (NSS) Cell-ni gita International Yoga Day-ko manianio, NEHU-ni Vice Chancellor Prof Shukla-ba dongpae bak ra·angahachim ine nikna man·a.
Ia program-ko ong·ataniio NEHU-ni Vice Chancellor baksana, skigiparang, gipin kamko ka·giparang aro dingtang dingtang department-ni chatro chatrirangba bakko ra·angahachim.
Ia manianio bakko ra·giparangoni bang·batan mask-ko gantokjahani gimin Vice Chancellor-ni COVID positive ong·ani ja·man university-o poraienggipa bang·bata chatro chatrirangan, jajrengchakaniko parakattokaha.