TURA: ANVC dolrang baksa ma·mong aro a·dok sorkarirangni songgigrikaniko pe·ani a·selsa Garo Hills-o mikkarang jime waanganichi bang·a rama jal·langrangan nosto ka·ako man·aha ine Bristibar salo, Tura-ni BJP MDC Bernard N Marak parakataha.
Tura MDC-ni parakatani gitade, Garo Hills-ni rama jal·langrangko namdapatna gita ANVC dolrang baksa songgigrikgipa lekkani para 6.3-o tik ka·manahachim indiba ia songgigrikaniko sorkari, chu·sokatchipjahani a·selsa da·o rama jal·langrang nosto ka·ako man·tokengahachim.
“Iani bidingo ma·mong aro a·dok sorkari dolgnian dingtang dingtang kamrangko a·bachengate, ia kamrangko somoi gita matchotatna jotton ka·gen. Shillong-Nongstoin-Tura ramako tarina a·bachengataha aro mongsonggipa a·jarang baksana nangchongmotgipa ramarangko taridapna gita 12th Plan-on kraa gita outlay-rangko tarimanaha. Bolni dolongrang pilakkon 12th Plan-ni somoion RCC dolongrangchi rikskana tik ka·manaha. Iarang baksana Dhubri-Garo Hills aro Khasi Hills-ko nangdimeate rama tarina gitaba India sorkarini MORTH ra·chakmanahachim. Indake ong·genchimoba, Shillong-Nongstoin-Tura ramako tarian baksana Dhubri-Garo Hills aro Khasi Hills ramana sanction ka·ana agrede bolni dolongrangko RCC dolong rikskaani kamrangkode a·bachengatskajaha,” ine Marak parakataha.
Ma·mongo BJP sorkari bilona re·baani ja·man, dingtang dingtang bobil dolrang baksa songgirikanirangko dake, bobil dolrangko bon·atna kamko ka·ahaoba, bang·a changon a·dok sorkari, iarangni gimin dilsretna jotton ka·skaaha ineba Tura-ni MDC matnangataha.
ANVC dolrang baksa songgigrikgimin kamrangko nitimna songe dongipa monitoring committee, tom·anirangko ong·ate kamrangko ka·jahani a·sel Garo Hills-o manderang neng·nikanirangko chagrongna nangkuenga ineba Marak parakataha.
“Ia monitoring committee, jadokprakon tom·anirangko ong·ate kamrangko nirokna nangachim indiba ia committee, tik ka·gimin gita kamrangko ka·jaha. ANVC dolrang baksa songgigrikaniko gitcham sorkari pe·aha aro da·oba ia songgigrikaniko nichanggalengkua. Ia songgigrikaniko kakket aro bebeo chu·sokatgenchimode da·o gita Garo Hills-o iandakgipa obostarangko chagrongna nangjanaba gnangchim,” ine Marak parakataha.