TURA: SMS-rang gita, phone call-rang gita, mobile app-rang gita aro Facebook, Whatsapp, Instagram aro uandakgipa social media-rang gita manderangko cha·bokna jotton ka·anirangko nikna man·rongengani gimin, iandake cha·bokgiparangna mikrake dongchina gita West Garo Hills a·jani Deputy Commissioner u·iataha.
Iandake mobile phone aro social media-rang gita cha·bokgiparangna mikrake dongchina u·iatengon, ma·sina man·gijagipa manderangni ba address-rangoni SMS, e-mail, Facebook, Instagram, Whatsapp ba uandakgipa social media-rang gita watatenggipa link-rango click ka·jachina Deputy Commissioner mikrakataha. Ia link-rango click ka·on, cha·bokna jotton ka·enggiparang, mobile phone-ni code-rangko kulie, ua mandeni message, photo aro video-rangko nina man·aia ineba ua parakataha.
Ma·sigijagipa manderangni share ka·atenggipa ba website-rango promote ka·enggipa link-rangko jakkale maming application-rangko download ka·jachina gita mikrakataniko on·angengon, iandakgipa application-rangko download ka·genchimode, manderangni phone-rangko hack ka·e ma·manti ma·sie ra·na nanganirangko ma·sie ra·na man·gen ine Deputy Commissioner parakatenba, nangchongmota application-rangko download ka·na gita pangnan Google Play Store ba Apple Store-ko jakkalchina manderangko didiataha.
Bank account baksa link donggipa mobile nombor-rangko skatang, sakgipinrangna on·jachina gitaba DC mikrakataha.
Iandakgipa kamrango dakchakanirangko nanggenchimode 1930 National Helpline Nombor-ona phone ka·chinaba Deputy Commissioner u·iataha.
