SHILLONG: Re·baenggipa 2023 bilsini Assembly election-o bang·bate seat-rangko chena gita National People’s Party (NPP) tarisamsoenga ine u·iataha.
NPP-ni national vice president aro a·dokni Deputy Chief Minister Prestone Tynsong-ni parakatani gitade, batanggimin changrangona bate ia chango bang·bate seat-rangko chena gitasa NPP tarisamsoenga.
2023 bilsini Assembly election-o NPP dol, gipin dolrang baksa bakrimgija doltangari susana miksongenga ineba Tynsong parakataha.
Gipin dolrangni krengbate kam ka·anichi NPP-na nangchakeani donggenma ine sing·on, “Iade chingni candidate-rangni jakosa ong·aigen aro uamang maikai manderangona re·ange manderangna agan-talate on·na nanga, chinga uamangna agangen,” ine NPP-ni dilgipa aganaha.
Election-rango chena gitasa NPP rake kamrangko ka·engani gimin sorkarini kosako matnangenggipa dolrangna aganchake roani somoi dongja ineba Tynsong parakataha.
“Manderang NPP-ni gimin ma·sigiparang ong·a aro uamangsa election-ode seokgen. Uni gimin ia somoio chinga sorkarini kosako matnangenggipa dolrangko matnangskae rona nangnikja,” ine ua aganaha.
Chief Minister-ni candidate-na sako miksongenga ine sing·on, da·o dipet iani gimin NPP chanchia dongkuja ine Tynsong parakataha.
Meghalaya a·dokode manderang party-ko ong·ja indiba candidate-kosa nie seoka ineba a·dokni Deputy Chief Minister parakataha.