TURA: Jagnina skang Tura-oni gimagipa me·tra saksani manggisiko, uko so·ote galgipa mandeni dilanganichi Sonibar salo police-rang, North Garo Hills a·jani Bajengdoba-o donggipa Didram chiring sambao gope galako man·aha.
Bilsi 19 ong·gipa Neha G Momin, jagnina skangan Tura-oni gimaaha aro uni gimaangani ja·man, uni nokdangni manderang, April jani 20 tariko Tura Women Police Station-o missing report-ko on·eahachim.
West Garo Hills a·jani SP VS Rathore-ni u·iatani gitade, ia me·trani gimaani ja·man police-rang am·sandianirangko dakon, me·trako mikchagipa Solesh R Marak-ni dakjena jotton ka·aniko nike, ia mandeko chanchichipna a·bachengaha.
Neha aro Solesh sakgnian Bajengdoba-oni ong·achim indiba Tura-o donge poraitokengachim.
Uamang sakgnini bidingo police-rang am·sandion, ia me·trani gimaani somoio uamang sakgnian saksa sakgipinko mikchagrikmitingchim ine ma·sina man·aha aro uandaken me·chikni gimaanio maming gipin a·selrangko nikjae police-rang, Solesh-ko potchipna a·bachengaha.
Ia me·chikni gimaanio maming gipin a·selrangko nikjae June-ni 22 tariko police-rang, Solesh Marak-ko Bajengdoba-oniko rim·eaha aro unbaksana bilsi sokkugijagipa me·a bi·sa saksakoba rim·aha.
Solesh-ko rim·ange police-rang sing·sandina a·bachengon, ua Neha-ko mikchaa bilsi 2 bilsi 3-mang ong·ahachim indiba ua sakgipin me·asako mikchaenga ine potchipenba, rim·a man·gipa me·a bi·sa baksa Neha-ni gimin sandina a·bachengaha ine Solesh parake on·aha.
Iandake Neha-ni kosako potchipna a·bachengenba ua sanale aro ka·o nange Neha-ko so·ote galna manchisrangaha ine Solesh ku·rachakaha.
Uandaken ua darangba ma·sijachina gita Neha-ko Tura-oniko Bajengdoba-ona okamatmika dakaha aro unwalon ua Neha-ko ka·saninggija dake so·ote galaha ine Solesh, police-rangna ku·rachakaha.
Neha-ko so·otani ja·man Solesh, uni manggisiko, rim·a man·gipa sakgipin me·a bi·sa baksa Didram chiring sambao donggipa Sona Chiring-o gope galaha.
Ia me·trani gimaaoni jagnini ja·man police-rang, Sonibar salo, uko so·ote galgipa mandeni dakchakanichi, uko gope galgipa gopramko nike, uni manggisiko ra·ongkatna man·aha ine kobor on·aha.
Ia me·trani mobile phone-koba police-rang, dos dakgipa Solesh Marak-ni nokoni metre 100-mang ong·gipa biapo dape galako man·aha.
Manggisiko ra·ongkatani ja·man, post mortem ka·na gita Tura-ona ra·baaha aro da·o dos dakgipa manderangni kosako charge sheet ka·na police-rang, sandirokanirangko dakdapenga ine u·iataha.
