SHILLONG: Ma·mong sorkarini ra·gatgipa Agnipath scheme-ara chadamberangni ka·dongchakaniko ‘cha·bokgipa’ gitasan ong·aia ine ia scheme-ko ra·galpilchina gita Meghalaya a·dokni Governor Satya Pal Malik, ma·mong sorkariko didiataha.
Malik-ni aganani gitade, Agnipath scheme-ni ning·o bilsibrina Indian Army-o rimnapako man·e maming pension gri kamoni neng·takna nanggenchimode bia ka·ani cholrangba dongjawahachim.
Malik, jean Jammu & Kashmir a·dokniba governor ong·e dangdikahachim, contractual basis-o chadamberangko sipai dolrango rimnapna ra·gatgipa scheme-ko ra·galpilchina gita ma·mong sorkariko didiangaha.
Ia Agnipath scheme-ni ning·o rimnapako man·gipa sipairangoni 75 percent-de bilsibrina kamko ka·ani ja·man, pension ba health insurance baksa kamoni neng·takna gita nangaignokchim.
“Ia sipai ong·na sienggipa chadamberangko jadokna skie on·gen aro jadokna chutti man·gen. Bilsi gittamna kamko ka·ani ja·man uamang noktangtangona re·bapilahaon, uamang bia ka·na proposal on·anirangko man·jawa,” ine Malik, kobor ra·timgiparangna parakataha.
“Ia Agnipath scheme-ara mikkangchi sipai ong·na sikenggipa chadamberangko aro uamangni ka·dongsoanirangko cha·bokgipa gitasan ong·enga,” ineba Malik aganaha.
