SHILLONG: West Garo Hills a·jani Phulbari jolrango niam gri ro·ongrangko bikotenga ine dingtang dingtang dolrangni matnanganiko Phulbari-ni MLA SG Esmatur Mominin jegalatenba, da·o dipet Phulbari jolrango niam gri ro·ong bikotgiparang dongja ine parakataha.
Phulbari samba jolrango niam chalaienggipa ro·ong quarry dam 500-mang gita donga ine agananiko jegalatengon, uni area-o ua niam gri ro·ongrangko bikotna on·ja indiba badiaba badiaba biaprango ro·ong quarry-rangde donga ine Mominin parakataha.
“Angni ma·siani gitade, da·o dipet Phulbari jolrango niam gri ro·ong bikotgiparang dongja aro je ro·ong quarry donggiparangba manderangni janggi tangani cholrangsan ong·aia,” ine Phulbari MLA aganaha.
West Garo Hills a·jao niam gri ro·ong bikotaniko ia bilsini a·bachengaon District Administration champengatahachim ine nikna man·a.
Chibinang-Bikonggre-Dadenggre ramao dam 300-na baten niam gri chalaienggipa ro·ong quarry-rang donga ine adita salrangna skangsan jolni manderang parakatahachim ine nikna man·a.