SGH-o neng·nikanirangko man·enggipa manderangna dingtang dingtang dolrang dakchakgrima

TURA: Batanggimin antirango mikkarang jimbee waanganichi South Garo Hills a·jao chirang banne aro a·arang be·e bang·a manderangan neng·nikanirangko chagrongna nangtokengani gimin dingtang dingtang NGO-rang, mondolirang, gittimrang, me·chik dolrang, prayer cell group-rang aro uandakgipa dingtang dingtang dolrangba an·tangtangni bil ama gita duko ga·akenggipa manderangna dakchakanirangko on·attokenga.
Iandake duko ga·akenggipa manderangna dakchakanirangko on·enggipa dolrangoni A·chik Heritage Pursuits (AHP)-ba dolsa ong·a aro ia dolba, duko ga·akenggipa manderangna dakchakanirangko on·na man·a gita dingtang dingtang gittimrangoniko, mondolirangoniko aro dingtang dingtang dolrangoniko dakchakanirangko ra·skaenba, neng·nikanirangko man·enggipa biaprangona manderangni nangenggipa bosturangko sokate on·na kam ka·enga ine u·iataha.
AHP doloni u·iatani gitade, dingtang dingtang gittimrang, mondolirang, me·chik dolrang, chadambe dolrang aro uandakgipa dolrangoniko gilgrimaton, konta 24-ni gisepon gong 88,500/- tangkarang baksana manderangni nangchongmotgipa ma·manti bosturangkoba man·soaha aro ia gilgrime man·gipa tangka paisarang aro ma·manti bosturangko uamang, South Garo Hills a·jani Siju, Moheskola aro uandakgipa biaprangona sokatna kam ka·enga.
Iandake dakchakanirangko on·giltokahani gimin AHP-ni dilgiparang, dingtangmancha Dobasipara Baptist Mondoli, A·dinggre Prayer Cell, Tura Baptist Mondoli, Chimik Women’s Group aro dingtang dingtang dolrangkoba mittelpilataha.
AHP-oni u·iatani gitade, neng·nikanirangko man·enggipa biaprangona, Rongram Block aro dingtang dingtang dolrangba re·ange dakchakanirangko on·enga.