SHILLONG: A·songni chadamberangko sipai dolrango rimnapna gita ma·mong sorkarini ra·gatgipa Agnipath Scheme-ko Meghalaya Pradesh Congress Committee (MPCC) aro State Mahila Congress Committee (MCC)-ni dilgiparangba Sombar salo, Shillong songjinmani Congress Bhawan-o jinma jegalgrimangtokaha.
Ia Agnipath scheme-ara Indian Army-rango napna miksonge dongenggipa chadamberangko cha·bokgipa gitasan ong·aia ine a·song gimikon ia scheme-ko jegaltokengachim ine nikna man·a.
Indake ong·engon, MPCC aro MCC-ni dilgiparangba ia scheme-ko jegalatenba, chadamberangni namgnina ia scheme-ko ra·galpilchina dabiangtokaha.
“Congress dol, a·songni chadamberang baksa kim·kim ong·e chadengenga aro ia scheme-ko ra·galpilna dakgrikanichi chinga chadamberangni bilrangko chel·chakna ku·rachakenga. Agnipath scheme-ko ma·mong sorkari ra·galpilna nangchongmota maina ian a·songni naljokaniko pe·na sienggipa scheme ong·a,” ine MPCC aro MCC-ni dilgiparang parakataha.
Ia scheme-ni niam gita jadokna training-ko on·aniara mikkangchi sipai ong·na sienggiparangna chu·ongjawa aro chu·onga gita training-ko on·ani gri sipai dolrango rakkianiara ra·chakna man·gijani ong·a ineba Congress dolni dilgiparang parakataha.
“Dingtang dingtang jolrango so·sojengjeng ong·anirangko nikna man·engon aro India a·songo Chinese sipairangni napdrana jotton ka·engmiting somoio ma·mong sorkarini iandakgipa scheme-ko ra·gataniara namen aiao inmanani ong·a,” ine MPCC aro MCC-ni dilgiparang parakataha.
