SHILLONG: Sombar salo, Meghalaya a·dokni Cabinet tom·e chanchirimangenba, Meghalaya Energy Corporation Limited (MeECL) aro iani ning·o donggipa damgittam company-rangko namdapatna gita manchie donangaha.
Cabinet tom·a matchotani ja·mano kobor ra·timgipa manderang baksa agangrikengon, batanggimin bilsi 50-ni gisepo dingtang dingtang kamrangko ka·na nangenggipa a·dok sorkarini official-rangsa MeECL-ko chalaina nange kamrangko name ka·na man·jaengani gimin MeECL-ko gital dake chalaina Meghalaya Cabinet tik ka·angaha ine a·dokni Chief Minister Conrad K Sangma parakataha.
Chief Minister-ni parakatani gitade, batanggimin somoirango MeECL-ni chairman apsanan managing director-ni kamkoba ka·e kamrangko name ka·na man·jaengani gimin chairman aro managing director-ko ma·ekatna Cabinet tik ka·angaha.
MeECL-ni managing director (MD)-ko songani gimin chanchiangengon, MD-ni kamna niam gita seokgimin IAS cadre ba kamni gimin u·i-ma·sigipa official ong·na nanggen ine Chief Minister parakataha.
MeECL-ni MD ong·enggipa mandean, Meghalaya Energy Power Generation Corp Limited, Meghalaya Energy Power Distribution Corp Limited aro Meghalaya Energy Power Transmission Corp Limited-ni MD ong·gen ineba Chief Minister parakataha.
MeECL-ni non-executive chairman-na a·dokni Power Minister-ko songskagen aro gipin damgittam company-rangkode Chief Secretary, Additional Chief Secretary ba Principal Secretary-rang dilangskagen ineba Chief Minister parakataha.