SHILLONG: Meghalaya a·doko 110 Mega Watt (MW)-ni gita bijoli chu·ongjaengani a·sel a·dok gimikon load shedding ba bijoliko kimitna nangenga ine a·dokni Chief Minister Conrad K Sangma parakataha.
Adita salrangna skangde Tura-o pringwal 1:00 bajioni 5:00 bajimangona bijoliko kimitrongachim indiba salsa salgni skang da·o Tura-o bijoliko pring 3:00 bajioni kimitskaengahachim. Walo bijoliko kimitan baksana basakobarangde pringoba adita kontarangna bijoliko kimitenga aro iani a·selan manderang neng·nikanirangko man·tokengachim.
Meghalaya a·doko hydro project-rangchi bijolirangko bikote an·tangtangan chalaiengan baksana batanggimin antirango mikkarangba chu·onga gita waangahachim.
Indake ong·genchimoba, a·doko 110 MW-mangni gita bijoli chu·ongkujaenga aro iani a·sel a·doko load shedding-ko ra·gatna nangkuenga ine Chief Minister parakatskaaha.
Chief Minister-ni parakatani gitade, Meghalaya a·dokni bijoli bree jakkalenggipa damgittam national company-rangni unit-rang da·o kam ka·jaenga aro Leshka, Umiam aro Umtru project-rangba dingtang dingtang a·selrangchi da·o kamrang ka·jaengani a·sel bijolirangko chu·onga gita man·jaenga.
Sin·karini somoirango Meghalaya a·dok, bijoliko ra·sroe jakkalchengaha aro da·o wachini somoio man·enggipa bijoliko on·pilskana nangengaha ineba Chief Minister parakataha.
“Jaantian chinga 80 million unit-ni bijoliko on·pilna nangenga. Indake ong·genchimoba, da·o antisa antignini gisepon mitam unit-rang kam ka·gnok ine chinga ka·dongenga,” ine Sangma parakataha.