TURA: North Eastern Hill University (NEHU) Tura campus-o poraienggipa chatro chatrirangoni sak 27 chatro chatrirang COVID-19 positive ong·aha ine Post Graduate Students Union (PGSU) parakatenba, NEHU Tura campus-o COVID-19 batrikrikjana gita COVID-19 man·gipa chatro chatrirangko nambate nirok sandichina aro university-ni hostel-rango chel·chakanirangko dakchina NEHU Tura campus-ni in-charge-ko didiataha.
PGSU-ni president Francis R Marak-ni parakatani gitade, NEHU Tura campus-o COVID-19 positive ong·gipa sak 27 chatro chatrirangoni sakgittamkosan Tura Civil Hospital-o donenga indiba gipinrangkode dingtang dingtang hostel-rang, jekai Norombi Girls Hostel, Arbella Girls Hostel, Nokrek Boys Hostel, Sampalgre Girls Hostel aro Working Women’s Hostel-on donengachim.
“COVID-19 man·gipa chatro chatrirangko hostel-rangon donengani a·sel hostel-o dongenggipa chatro chatrirang, palangrangko aro bathroom-rangko apsan jakkalna nange neng·nikanirangko chagrongna nangtokenga. Chingni kobor man·soani gitade, hostel-ko chalaienggiparang, COVID man·gipa chatro chatrirangna dingtang kuturirangko on·jaenga aro COVID man·pagijagipa chatro chatrirang baksa apsan kutirirangon dongatenga aro iani a·sel chatro chatrirangna namen kenbegni ong·enga. Uni gimin COVID man·gipa chatro chatrirangko NEHU Tura campus-ni guest house-o dingtang donchina chinga mol·molatenga,” ine PGSU-ni president parakataha.
PGSU-ni gita June 27 tariko Norombi Girls Hostel, Arbella Boys Hostel aro Nokrek Boys Hostel-o dongenggipa chatro chatrirangna mask, sanitiser, samrang aro juice-rangko suale on·angaha ine janapatengon, Working Womens Hostel aro Sampalgre-o donggipa Old NEHU Guest House-o dongenggipa chatro chatrirangnaba samrangko, mask-rang aro gipin nangchongmotgipa bosturangko sokate on·china PGSU, NEHU Tura campus-ni in-charge-ko didiataha.
July 1 tarikonin mitam department-rang semester porikkarangko a·bachengengahani gimin chatro chatrirang, porikkarangko sena re·angtokgnok ine janapatengon, iandake COVID-19 man·gipa chatro chatrirangna simsaksojagenchimode university-o poraienggipa chatro chatri gimiknan kenna nangani ong·gen ine PGSU-ni president parakataha.
Indake ong·engon, NEHU Tura campus-ni nakuramo sanitiser-rangko donchina gitaba PGSU didiataha.
