AMPATI: Professor Prasanta Chandra Mahalanobis-ni atchiani salko maniani bak gita aro uni Economic Planning aro Statistical Development-na on·gilaniko gisik ra·na gita Budbar salo, National Statistics Day-ko South West Garo Hills a·jani Ampati Multi Facility Centre-o maniangaha.
Ia program-ko India sorkarini Ministry of Statistics & Program Implementation-ni ning·o Ampati-ni District Statistical Office-ni gita ong·atangaha aro ia program-o chatro chatrirang, skigiparang aro dingtang dingtang department-ni officer-rangba dongpae bak ra·angaha.
Ia salko maniani bak gita dingtangmancha quiz competition-koba chadamberangna aro skulo poraienggipa chatro chatrirangna ong·atangaha.
Ia program-ko ong·atanio South West Garo Hills a·jani Additional Deputy Commissioner AVD Shira, mongsonggipa sokgipa ong·e jinmana aganprakangengon, lekka porani a·bao data-rangko chimonganio gamchatgipa ong·ani gimin aganangenba, HSSLC aro SSLC porikkani result-o Statistics-an, a·ja gimiko chatro chatrirangni performance-ko mesokna dakchakaha ine parakataha.
Mathematics gita dakgipa subject-rango gisik nangbatchina chatro chatrirangko didiangengon, Professor Mahalanobis-ni ja·kurangko ja·rikchina gita Shira, chatro chatrirangko ku·pattiangaha.
Ia tom·anio Ampati-ni District Statistical Officer SG Momin, tom·bagiparangna rimchaksoani kattarangko aganangengon, National Statistics Day-ko maniani bidingo jinmana talate on·angaha.
Ia tom·anio Ampati Govt Higher Secondary School-ni Assistant Lecturer Sengra Ch Momin aro gipinrangba dongpae jinmana aganprakangaha.
