SHILLONG: Meghalaya a·dokni adhoc skulrango skigiparangna dormaharangko bariatchina dabie dontonggija jingjengatanirangko dakengon, dingtang dingtang dolrangba skigiparangna bakrimaniko on·angenba, skigiparangna dormaharangko bariate on·china a·dok sorkariko didiangtokaha.
Budbar salo, All India Trinamool Congress (AITC)-ni national general secretary Abhishek Banerjee, Opposition AITC dolni dilgipa Mukul Sangma baksa jingjengatenggipa skigiparangko grongeaha aro skigiparangni nanganirangko jako ra·e kamko ka·na ku·rachakaniko on·angaha.
Apsan daken, BJP-ni MLA AL Hek-ba jingjengatenggipa skigiparangna chakpaaniko on·angaha aro maini gimin skigiparangni dabianirangko chu·sokatna man·jaenga ine sorkariko sing·doangaha.
“Sorkarini kamara a·dokko chalaianian ong·a indiba a·dokko chalaiengon, skigiparangni nangnikanirangkon chu·sokatna man·jaenga ong·ode maidake sorkariko chalaienga?” ine skigiparang baksa agangrikengmiting somoio Hek, sorkariko sing·doangaha.
BJP-ni national executive meeting-ko da·o bakan Hyderabad-o ong·atna siengani gimin ia tom·anio skigiparangni gimin chanchirimanggen ineba Hek ku·rachakaniko on·angaha.
Indake ong·engon, adhoc skulrango skigiparangni dabianirangko chu·sokate on·na man·na gita ta·raken ja·kurangko de·china UDP dolba, a·dok sorkariko didiangaha.
Skigiparangni jingjengatenggipani bidingo uamang, UDP-ni MLA aro a·dokni Education Minister Lahkmen Rymbui baksa agangrikaha ine UDP-ni general secretary Jemino Mawthoh parakataha.
Apsan daken, Thma U Rangli-Juki (TUR) aro Workers’ Power of Meghalaya (WPA) dolrangba, jingjengatenggipa skigiparangna an·tangtangni chakpaanirangko parakataha.
Skigiparangni dabianirangko chu·sokatgen ine sorkari, skigiparangko cha·bokaha ineba ia dolrang, an·tangtangni suk ong·gijaniko parakataha.
“Cabinet-ni tom·anirango skigiparangni nangnikanirangko chanchigen ine ku·rachakani ja·manoba skigiparangni dabianirangko da·onan chu·sokate on·kujaenga. Chingni bebera·ani gitade, kamko ka·e cha·enggipa manderang pilakan kraa gita dormaharangko man·na nanga aro uamangni dabianiarangara asolan ong·achim,” ine TUR aro WPA dolrang parakataha.
Budbar salo, a·dokni Education Minister Lahkmen Rymbui, jingjengatenggipa skigiparangko grongenba, da·o changgipin Cabinet tom·anio chanchianggen inenba jingjengataniko dontongchina Federation of All School Teachers of Meghalaya (FASTOM)-ko didiangahachim indiba skigiparangna dormaharangko bariatkujaskal jingjengataniko dontongjawa ine skigiparang parakatskaahachim.
Adhoc skulrango skigiparangni dormaharangko bariatna gita bilsio gong kror 200-mangko nanggen aro ian a·dok sorkarina altua kam ong·jawa ine a·dokni Education Minister parakatskaaha.