SHILLONG: Re·anggipa Budbar salo All India Trinamool Congress (AITC)-ni national general secretary Abhishek Banerjee-ni a·dokona re·baani somoio a·dokni Chief Minister Conrad Sangma aro NPP-chi dilenggipa Meghalaya Democratic Alliance (MDA) sorkarini kosako matnangani kattarangko aganangahani gimin a·dokni Deputy Chief Minister aro NPP-ni national vice president Prestone Tynsong jegalatskaenba, Meghalaya a·dokona re·bajringe jinmani mikkango aganprakani bewalko skie ra·china didiataha.
National People’s Party (NPP)-chi dilenggipa Meghalaya Democratic Alliance (MDA) sorkariara Meghalaya a·dokni manderangko cha·bokenggipa sorkarisa ong·a ine Budbar salo, All India Trinamool Congress (AITC)-ni national general secretary Abhishek Banerjee matnangatenba, a·dokni Chief Minister Conrad Sangma-ko ‘Conman’ mingchina aro MDA-ko ‘My Development Alliance’ mingskachina aganangahachim ine nikna man·a.
Indake ong·engon, manderangni mikkango iandake a·dokni dilgipako aro sorkariko matnangahani gimin Tynsong, AITC-ni national general secretary-ko jegalatenba, uni kamara jinmani mikkango aganna changgijagipa bi·sani kamko mesokani gitasa ong·a ine parakataha.
“AITC-ni general secretary ong·e ua, a·dokni dilgipako iandake maming sakki gri matnangna skang name chanchichengna nangachim. Ua manderangni mikkango aganna changja ong·ode Meghalaya a·dokona re·bajringe iandakgipa bewalko skie ra·na man·gen,” ine Tynsong aganaha.
Assam aro Meghalaya a·dokni simarango ong·enggipa golmalrangko namatna a·dok damgnini soi ka·grikgipa MoU-ko matnange aganahani gimin Banerjee-ko jegalatengon, ian ru·utbea bilsirangna ong·enggipa obostasa ong·a aro ua salsamangmang a·dokona re·bae ia kamni gimin aganpaaniara namen kragijani ong·a ine a·dokni Deputy Chief Minister parakataha.
“Sima arini bidingo AITC-ni politics kal·na jotton ka·aniko nike anga namen duk ong·a. MoU-o soi ka·grikna skangba chang 11 ba chang 12 tom·anirangko ong·atesa aro name sandirikkitchengesa ka·ahachim. Uni iandake sima arini bidingo agananiara bi·sarangni aganani gitasan ong·aiaha,” ine Tynsong aganaha.
