South Tura-ni gitcham MLA, BJP-o napa

TURA: South Tura constituency-ni gitcham MLA John Leslee K Sangma, re·anggipa Budbar salo, Bharatiya Janata Party (BJP)-o napangaha.
Sangma-ko BJP-ni state president Ernest Mawrie, BJP Minister Sanbor Shullai aro BJP MLA AL Hek, BJP-ona rimchaksoaha.
BJP-o napangani ja·man kobor ra·timgipa manderang baksa agangrikengon, da·o bilsi 20-nade ma·mongo BJP dolan sorkariko rikangkugen aro iako Garo Hills-osan ong·aigija Meghalaya a·dok gimikon manderang ma·sienga ine John Leslee parakataha.
“Ma·mongo BJP sorkariko rikenga ong·ode Meghalaya a·dokoba namroro silroroaniko ra·bana gita an·ching BJP-ko nangenga aro iani giminsa anga Meghalaya a·dokna aro mongsongbate Garo Hills-o namroro silroroaniko ra·bana gita BJP-ona re·baaha,” ine John Leslee Sangma parakataha.
Sangma-ni parakatani gitade, Meghalaya a·doko chadamberang kamrangko ka·e cha·na man·jae neng·nikanirangko man·tokenga, rama jal·langrangni obostaba namsrangjaenga aro mongsongbate an·seng baljokani a·bao kamrangko namdaptna nangchongmotenga aro ia kamko chu·soknade BJP dolmangmangsan man·aigenchim.
Re·baenggipa 2023 bilsini Assembly election-o ua South Tura constituency-oni susana kusi ong·genchim ine janapatengon, election-o uko candidate-na seokanichi party-ni jakosa ong·aigen aro dilgiparangni nangnikaniosa ong·aigen ine Sangma parakataha.
Da·o dipet South Tura constituency-o Meghalaya a·dokni Chief Minister Conrad K Sangma, MLA ong·engachim aro re·baenggipa bilsini Assembly election-o da·o Tura-ni BJP MDC ong·enggipa Bernard N Marak-ba susana miksongskaengachim.

Get real time updates directly on your device, subscribe now.

Comments are closed.