Adhoc skigiparangni dabianirangko knachakchina sorkariko MJCTU&A didia

SHILLONG: Meghalaya a·dokni adhoc skulrango skigiparangni dabianirangko sorkari knachakjaengani gimin re·anggipa Mongolbar salonin skigiparang, ramarango tukampile jingjengatanirangko daktokengon, skigiparangni dabianirangko knachakchina gita Meghalaya Joint Council of Trade Unions & Associations (MJCTU&A) dolba, a·dok sorkariko didiataha.

Adhoc skulrango skigiparangni jingjengatanirangko dakna nagengani gimin an·tangtangni suk ong·gijaniko parakatengon, a·dok sorkarini ku·rachakaniko man·ahani giminsa skigiparang, batanggimin changrangoba jingjengatanirangko dontongahachim indiba skigiparangna ku·rachakgimin kattarangko sorkari chu·sokatchipjahani giminsa skigiparang da·o jingjengattaina nangao ga·akenga ine MJCTU&A-ni dilgiparang parakataha.

“Federation of All School Teachers of Meghalaya (FASTOM)-ni ning·o jingjengatenggipa skigiparang, ru·uta somoirangonin an·tangtangni kamko deficit Grant-in-Aid gadangona ra·dochina aro dormahako bariate on·china gitasa dabitokengachim. Skigiparangni dabianirangko sorkari knachakjaengani giminsa da·alo uamang ramarango tusikampile jingjengatna nangao ga·akengaha,” ine MJCTU&A-ni dilgiparang parakataha.

Skigiparangni jingjengatanio bakrimpaaniko aro chakpaaniko parakatengon, chatro chatrirangni namgnina aro mongsongbate a·doko songdongenggipa manderangni namgnina skigiparangni dabianirangko ta·raken chu·sokate on·china MJCTU&A, sorkariko didiataha.

Sukrobar salo, MJCTU&A-ni dilgiparang, jingjengatenggipa skigiparangko grongeaha aro an·tangtangni bakrimaniko parakeaha.

Get real time updates directly on your device, subscribe now.

Comments are closed.