TURA: South Garo Hills a·jani Alagre community & health centre (CHC)-ko taridape on·anirang dongjaengani a·sel saenggipa manderangsan ong·aigija health centre-o kam ka·enggipa manderangba neng·nikanirangko man·tokna nangenga ine Garo Students Union (GSU) Chokpot, Silkigre aro Asugre unit-rang parakatenba, jolo songdongenggipa manderangni namgnina ia CHC-ko ta·raken taridape on·china a·dok sorkariko didiataha.
GSU Silkigre unit-ni general secretary Chingkam Ch Sangma-ni parakatani gitade, GSU Chokpot, Silkigre aro Asugre unit-ni dilgiparang, Alagre CHC-ona re·ange nion, ia health centre-o doctor aro gipin kam ka·giparangba chu·ongjaenga, health centre-ni nokkingrangba selenga, health centre-o X-ray machine-ba dongja, chirang aro bijolirangba dongja ine nikbana man·aha.
“Uni gimin songni nokni manderangni namgnina ia health centre-ko nirokate nanga gita taridape on·china aro kam ka·giparangko chu·onga gita on·china chinga a·dokni Chief Minister Conrad Sangma-ko mol·molatenga,” ine GSU-ni dilgiparang parakataha.
Comments are closed.