SHILLONG: Adita salrangna skang, Shillong songjinmao poraienggipa Kerala a·dokni chadambe sakgni baksana traffic police aro Swiggy delivery boy-ko kragija dokgipa manderang, Budbar saloba Jaiaw-o sakbonga manderangko chadraptaiaha ine police-rang kobor on·aha.
East Khasi Hills a·jani Superintendent of Police (SP) Sylvester Nongtnger-ni u·iatani gitade, Assam a·dokoni kam ka·e cha·enggipa sakbri manderang, Jaiaw-o donggipa nok te·sao kam ka·na gita re·angahachim aro attamni 6:10 bajimango uamangni taxi-o re·bapilengmiting somoio, adita sak manderang, uamangko Umpohliew-o donggipa dolongo dongdipataha. Gariko dongdipatani ja·man ia manderang, taxi-o re·baenggipa mande sakbri aro taxi driver-ko chadrapaha aro ia manderangni chadrapanio mande saksade hatturichi dokako man·e bilongkalen mata bu·aniko man·aha.
Ia manderangko iandake chadrapengmiting somoio ua jolni VDP membor-rang rikbae champengna man·aha aro ia manderangko rikenba, Mawlai Phudmuri, Madan Heh-ona dakanggipa ramaoniko saksakode rim·rikna man·aha.
Iani bidingo koborko man·soa bakan police-rang, a·sel ong·chakgipa biapona re·ange chadrapa man·gipa manderangko Shillong civil hospital-ona rimangchengaha, jeon saksakode hospital-o admit ka·na gita nangaha.
Iani ja·mano police-rang, jolo songdongenggipa manderangni dakchakanichi, dos dakgipa sakbonga manderangko rim·dapna man·aha. Ia sakdok manderangoni sakgittamde bilsi sokkugijagipa chadamberangsa ong·achim.
Iani ja·manoba police-rang, attam walangchibara ia dolni sakgipinkoba rim·taina man·aha aro uandaken da·o re·anggipa June 24 tariko ong·gipa a·selna rim·ako man·giparang gimik sak 11 gapengaha.
Iani bidingo gital dake Lumdiengjri police station-o mokordoma ka·taiaha.