Tura: Aapda Mitra Scheme-ko nambatna gita skanggipa phasetraining-ko, District Disaster Management Authority, West Garo Hills, SMELC, Dakopgre, Tura-o mijal salni bako ong·atangaha. Training-ko ong·ataniona, West Garo Hills-ni, Superintendent V S Rathore, Chief Guest ong·e sokbaaha.
Indake, a·dok mikkarang jimbee wae ba maiba a·sel ong·e neng·nikanirangko man·genchimoba, a·dokni Police-rang skanggipa biapona sokange kam ka·gipa ong·a ine jinmana agane, ua indake aganangaha, ”Mande kamrangni a·sel maiba namgijagipa obostarang ba mikka wae chi bana aro a·arang be·gruani somoio da·ode, skiako man·gipa Aapda Mitra Volunteer-rangan ta·rake kamrangko ka·na gita man·gnok. A·sel jekai ramarango gari a·sel ong·ani, wa·al ka·mani ba dingtang dingtang dakgipa obostarango, Aapda Mitra Volunteer-rang a·sel ong·gipa biaprangona re·ange kamrangko ka·na nanggen.”
Niksamsogijagipa a·selrang ong·ani somoirango, saksa sakgipina koborrangko on·rikrikanian gamchatgipa kam ong·a, uni gimin indakgipa somoirango a·sel obostani gimin kobor on·rikrikna gita nanga, ine ua aganangkuaha. Niksamgijgipa obostarango, VHS-ko an·ching jakkalna gita man·gen maina ian name chongipa aro jako ra·bitna namgipa bostu ong·a. Indiba jakkalengon, name simsake ra·bitna gita nanga jedakode ia bosturang ong·gijagipa manderangona sokangjawa aro gimaatgenchim ong·ode, authority-rangna ta·raken u·iatpachina, ine ua aganangaha.
Niksamsogijgipa obostarangko ta·rake kam ka·ani gimin ua indake aganangaha, ”Somoian gamchatgipa ong·a, uni gimin maiba namgija a·sel ong·genchimode, volunteer-rang ta·rake kamrangko ka·na nanga, jedakode janggirangko gimaatjawa. Unbaksana ua, pilak manderangkon, mande jatna an·tangtangko on·kanga baksa gisik nange kamtangtangko ka·china mol·mole aganangaha.
West Garo Hills, Tura-ni, District Disaster Management Authority, James D Sangma, sal 12-na, Aapda Mitra Volunteer-rangna ong·atgipa training-ko, June 23 tarikoni, July 2 tarikona ong·atangaha, ine parakataha. Tura, Dalu aro Rajabala jolrangni me·asa aro me·chikrang ia training-o bakko ra·angaha. Sangma-ni aganani gitade, NDMA, joltango volunteer ka·giparangko skie on·a, central sector scheme-ko ra·gatenga aro ia training-o, India-ni dingtang dingtang a·dokrango chi bana gongbatgipa biaprango kam ka·china gita skie on·gen. Skanggipa skie on·anio, sak 50 volunteer-rang bakko ra·angaha aro gnigipa skie on·anio sak 150 volunteer-rang bakko ra·anggen, ine ua aganangaha.
Skie ra·gipa, Chegrik Marak aro Salsime Marak, niksamsogijagipa a·sel, jekai chi banani, a·a be·ani, wa·al kamani aro dingtang dingtang dakgipa obostarango, SDRF, MPRO-ni kamrangara mai ong·a aro maidakgipa bosturangko jakkalna nanga, uarangko manderangna aganangaha. Indake, Traffic-ni niam aro Motor Vehicle Act-ni giminba, anti gnini gisepo training-ko ong·atanio skie on·angaha.
Bon·chotgipa salo, programme-ko ong·atanio, kombol-ko dedoani, Stretcher-ko jakkalani, Radio communication, anchi ong·aniko tipatani aro dingtang dingtang kamrangni gimiba dakmesoke ba skie on·angaha.
Indake, Chief Guest aro gipin official-rang, Certificate aro boksis-rangko, nambate dakmesoke mesokgipa group-rangna on·angaha. Best Volunteer Award-ko, John Marak-na on·aha, gnigipa gadangni award-ko Banlem Ch Sangma-na aro gittamgipako, Salsime Marak-na on·angaha.
Tom·aniona re·bae bakko ra·giparangara, Additional Deputy Commissioner aro DDMA-ni CEO, Dolrich Berin G Momin, Deputy Comptroller, Civil Defense S Sangma aro gipin official-rang ong·a.
