TURA: District Legal Services Authority (DLSA), West Garo Hills, Meghalaya State Legal Services Authority, Shillong-ni dakchakanio, District Rural Development Agency (DRDA), Health Department, District Disability Resource Centre, Social Welfare, ICDS, Agriculture and Horticulture Department baksa bakrime Sonibar salo Gambegre C&RD Block-ni ning·o ga·akgipa Sampalgre songo salsana Health Camp-cum-Legal Awareness Programme-ko ong·atangaha. Jeon Meghalaya High Court-ni Chief Justice Sanjib Banerjee, chief guest ong·e bak ra·angaha aro sepangjolgipa a·king jolrangoni Nokmarang sorkarini dingtang dingtang department-o kam ka·gipa official-rangba bak ra·angtokaha.
Uandake tom·anio bakko ra·e aganprakmitingo chief justice, indine aganaha, “India-ni Constitution an·chingna right ba bilko on·aha, indiba India jakgittel man·ani bilsi 75 gapaha, da·onamangba manderang an·tangtangna on·gipa bilko u·itokkujaenga, ian namen dukni aro jajrengani ong·a. Bilsi 14-ona free education, namgipa ramako man·a, ringani chi, health care ba iandakgipa ramram rights ba bil jekon Constitution an·chingna on·aha, iani gimin da·oba bang·an tale u·itokkuja.
Manderang an·tangni bilko man·a dakgrikna nanggen, manderang an·tangni bilko u·ie ra·osa an·tangtangna dakchakna cholko man·gen aro saksa sakgipinni gisepo dingtangrikani dongjawa aro an·ching songsalo me·chikrangko mande ra·jaskalde songsalo maming saloba tom·tomani dongjawa, ine aganaha.
Uandake Meghalaya High Court-ni Justice HS Thangkhiew-ba tom·ani bak ra·giparangna Legal Services Authorities Act, 1987, para-legal volunteer-ni miksongani gimin u·iate on·aha. Manderangna free legal service-ni chol donga ineba agandapaha.
Iarangni gisepon West Garo Hills Deputy Commissioner, Swapnil Tembe, “sorkarini dingtang dingtang on·enggipa scheme-ni namgnirangko man·a ba ra·na Aadhar card, EPIC, bank account-ko tarichina agan-ku·pattiaha.
Minggipin saksa para-legal volunteer Chakkim A Sangma, Sampalgre songo donggiparangni chagronggipa neng·nikarangko agane on·angaha.
Aro DRDA-ni project director MT Sangma, sorkarini dingtang dingtang scheme-rang jekai MGNREGS, PMAY-G, IGNOAPS, National Food Security Act, 2013, Midday-Meal Scheme, Payment for Eco-system Services, ba uandakgiparangni gimin talate on·angaha. Programe-ko ong·atao medical health camp-koba ong·atjolaha.
