Adhoc skulrango skigiparangni dormahako sorkari bariata

SHILLONG: Sombar salo Meghalaya Cabinet, adhoc skigiparangni dormahako bariatna gita tik ka·angaha aro skigiparangni dormahako bariatanichi bilsio a·dok sorkari, gong kror 100-mangko koros ka·dapna nanggnok ine u·iataha.
Adhoc skulrango skigiparangni dormaharangko bariatchina aro adhoc skulrangko deficit gadangona ra·dochina dabie re·anggipa antionin Federation of All School Teachers of Meghalaya (FASTOM)-ni gita Shillong aro Tura-o jingjengatanirangko dakangani ja·man adhoc skigiparangni dormahako bariatna sorkari, Sombar salo tik ka·angaha.
A·dokni Chief Minister Conrad Sangma-ni u·iatani gitade, adhoc skulrango skigiparangni dormahako bariatna sorkari tik ka·ahani gimin Higher Secondary, Secondary aro Science Teacher-rangni dormahako da·o gong 9000/-chi bariatgnok. Gong 24,000 ka·e man·enggipa higher secondary skigiparang da·o gong 33,000/- man·gnok, secondary skulrango skigiparangba da·o gong 29,000 ka·e man·gnok aro Science skigiparangba da·o japrako gong 31,000/- ka·e man·skagnok ine Chief Minister parakataha.
Upper Primary, Lower Primary, Hindi teacher aro SSA-ni ning·o 4th teacher-ni kamko ka·enggiparangnaba sorkari gong 6000/-chi dormahako bariatna tik ka·aha.
Upper Primary skulrango skigiparang da·o gong 22,000/- ka·e man·gnok aro Lower Primary-ko man·chape Hindi aro 4th teacher-rangba da·o gong 18,000 ka·e dormahako man·skagnok ine Chief Minister parakataha.
Chief Minister-ni parakatani gitade, adhoc skigiparangni dormaharangko bariatna tik ka·ahani gimin da·o bilsio gong kror 100-mangko koros ka·dapna nanggnok aro gimikchi gong kror 320-mangko bilsio koros ka·skana nanggnok.

Get real time updates directly on your device, subscribe now.

Comments are closed.