TURA: Gambegre C&RD Block-ni ning·o Darengre NH-51 ramaoni Nengja Bolchugre songona dakanggipa PMGSY ramako matchotgija donchipahani a·sel songni nokni manderang da·o neng·nikanirangko chagrongna nangtokengaha ine Nengja Bolchugre, Dilnigre, Nengjapara, Teksragre, Gallabagre, Amindagre, Amakgre aro Mengkakgre songni manderang parakatenba, ia ramako ta·raken niatchina gita West Garo Hills a·jani Deputy Commissioner-na sedoataha.
Adita salrangna skangsan, ia apsan ramani bidingo badi ka·anirangko man·soenba, West Garo Hills a·jani Deputy Commissioner Swapnil Tembe, PWD (Roads)-ni official-rang aro ia ramako tarigipa contractor baksa agangrikgen ine ku·rachakaniko on·atahachim.
Ia ramako taria matchotgija galchipaha ine matnange songni manderang an·tangtangan ia ramako tariani ja·man, songni saksa Ramenson Ch Marak, minggipa mande, social media-o photo-rangko ka·e mesokatahachim. Da·o ia ramako songni manderang an·tangtangan tarie re·rurana jakkalengahaoba wachi sokbae mikkarang wasimsimna a·bachengahani gimin ia ramana maming ka·donganirang dongjaengachim.
Koborko on·ani gitade, Darengre-oni Nengja Bolchugre songona dakanggipa ramako tarina gita 2014-15 bilsirango a·dokni gitcham chief minister Mukul Sangma-ni chawarigipani pagipa Fersen Ch Momin-na on·ahachim aro ia ramani bidingo ua baditaba chang engineer-rang aro SDO-rang baksa tom·e chanchirimani ja·manoba ia ramako matchotatchipgija donaiahachim.
Indake ong·engon, da·ororo mikkarang warongenganichi ia ramani obosta namjabatroroangengahani gimin ia jolrango songdongenggipa manderang, an·tangtangni suk ong·gijaniko parakatenba, ia ramako taripilna gita ta·raken ja·kuko de·china West Garo Hills a·jani Deputy Commissioner-ko didiataha.
Nengja Bolchugre-ona dakanggipa PMGSY ramani gimin songni manderang badi ka·doa
Date:
Share post:
