Sorkarini bariatgipa dormahana adhoc skigiparang kusi ong·gijaniko paraka

SHILLONG: Meghalaya a·dokni adhoc skulrango skigiparangna sorkari dormaharangko bariatna tik ka·ahaoba, sorkarini bariatgipa dormahana skigiparang suk ong·gijaniko parakatskaaha aro uandaken skigiparangni jingjengatangkuani bidingo Federation of All School Teachers of Meghalaya (FASTOM) da·al Mongolbar salni bako chanchie ja·kuko de·na tik ka·angaha.

Meghalaya a·dokni adhoc higher secondary, secondary aro Science skigiparangni dormahako gong 9000/-chi bariatenba, UP, LP, Hindi baksana SSA-ni 4^th teacher-rangna gong 6000/- ka·e bariatna Sombar salo Cabinet tik ka·angahachim ine nikna man·a.

Indake ong·engon, iandake sorkarini dormaha bariatanina FASTOM-ni dilgipa Mayborn Lyngdoh, suk ong·gijaniko parakatenba, skigiparang 50 percent-chi dormahako bariatna gitade sorkario dabijahachim ine talataniko on·angaha.

Skigiparangni jingjengatangkuani bidingo uamang Mongolbar salo chanchie ja·kuko de·anggen ineba FASTOM-ni dilgipa parakataha.

“Da·o dipet chinga skigiparangna dormaha bariataniko ra·chakgenma ra·chakjawa name tik ka·kuja indiba chinga iani bidingo officer-rangko aro minister-rangko gronge agangrikanggen. LP, UP, secondary aro higher secondary gadangrangna apsan dake bariatanikosa chinga nangnikenga maina ia gadangbrini skigiparangan batanggimin jagittamni gisepo ching baksa jingjengatanirangko dakpaaha,” ine FASTOM-ni ku·wattimgipa Mayborn Lyngdoh parakataha.

Lyngdoh-ni parakatani gitade, gadangni kri skigiparangni poraiani gadangrang dingtanggenchimoba, ia pilak skigiparangnan uamang apsan dake dormaha bariatanikosa nangnikengachim.

Mongolbar pring 11:00 bajio pilak skigiparangan apsan donge iani gimin chanchianggen ineba Lyngdoh parakataha.

Adhoc skulrango skigiparangni dormahako bariatna sorkari tik ka·ahani gimin da·o higher secondary skulrango skigiparang japrako gong 33,000/-ko, secondary skulrango skigiparang gong 29,000/- aro Science skigiparang gong 31,000/-ko man·skagnokchim aro unbaksa UP skulrango skigiparangba da·o gong 22,000/-ko, LP skulrango skigiparang gong 18,000/-ko, Hindi skigiparang gong 18,000/-ko aro SSA-ni 4^th teacher-rangba da·o gong 18,000/-o japrako man·skagnokchim.

Adhoc skigiparangni dormaharangko bariatna tik ka·ahani gimin da·o bilsio gong kror 100-mangko koros ka·dapna nangskagnok aro gimikchi gong kror 320-mangko bilsio koros ka·skana nanggnokchim.